މޫސުން ގޯސްވާނެ ކަމަށް ލަފާކޮށް މޯލްޑިވްސް މީޓިއޮލޮޖީ (މެޓް އޮފީސް) އިން ރާއްޖޭގެ 7 އަތޮޅަކަށް ވައިޓް އެލާޓް ނެރެފިއެވެ.
ރާއްޖޭގެ މޫސުމާ ބެހޭ އިދާރާ މެޓް އޮފީހުން ބުނީ ފ. އަތޮޅުން ފެށިގެން އައްޑު އަތޮޅާ ހަަމަޔަށް މިއަދު ހެނދުނު 9:30 އިން ފެށިގެން މެންދުރު ފަހު 3:30 އާ ދެމެދު ބޯކޮށް ވާރޭ ވެހުމާއެކު ގުގުރާނެ ކަމަށް ލަފާ ކުރާނެ ކަމަށެވެ.
"ދަ ޕްރެސް" އަށް މައުލޫމާތު ދެމުން މެޓް އޮފީހުން ބުނީ ވިލާ ގަނޑުގައި ކަނޑުތައް އާދައިގެ ވަރަކަށް ގަދަވިޔަސް އާންމު ގޮތެއްގައި ކަނޑުތައް މަޑުވާނެ ކަމަށެވެ. އަދި ކުރިއަށް އޮތް 24 ގަޑިއިރަށް އެންމެ ގަދަޔަށް މޫސުން ގޯސްވެ ވާރޭ ވެހޭނެ ކަމަށް ލަފާކުރެވެނީ ދެކުނަށާ މެދު ރާއްޖެތެރެއަށް ކަަމަށް އެ އިދާރާއިން މައުލޫމާތު ދެއެވެ. އަދި ވޭތުވެދިޔަ 24 ގަޑިއިރުތެރޭ އެންމެ ގަދަޔަށް ވިއްސާރަވެފައި ވަނީވެސް ދެކުނަށާ މެދު ރާއްޖެ ތެރެއަށް ކަމަށް މެޓް އޮފީހުން ވަނީ ބުނެފައެވެ. އެގޮތުން އެންމެ ގަދަޔަށް ވާރޭ ވެހިފައިވަނީ ލ. އަތޮޅަށް ކަމަށާ، ލ. އަތޮޅަށް 51 މިލިމީޓަރުގެ ވާރޭ ވެހިފައި ވާކަމަށް އެ އޮފީހުން މައުލޫމާތު ދެއެވެ.
މޫސުން ގޯސްވެ ގަދަޔަށް ވާރޭވެހި ގުގުރުމުގެ ސަބަބުން ރޭ މެންދަމު 1:15 އިން ފެށިގެން ފަތިހު 4:30 އަށް ޅ އަތޮޅުން ފ އަތޮޅާ ދެމެދަށް ވަނީ ޔެލޯ އެލާޓެއްވެސް ނެރެފައެވެ. ހަމަ އެއާއެކު ޅ އަތޮޅުން ތ އަތޮޅާ ދެމެދަށް ފަތިހު 4:30 އިން 8:30 އާ ހަމަޔަށް ވަނީ ވައިޓް އެލާޓެއް ނެރެފައެވެ.
ރޭ މާލެސިޓީ އަށްވެސް ވަނީ ގިނަ އިރުތަކެއް ވަންދެއް ބޯކޮށް ވާރޭ ވެހި ގުގުރާފައެވެ. އަދި މާލޭގެ ބޮޑު ސަރަހައްދެއްގައި ވަނީ ވާރޭ ވެހުމުގެ ސަބަބުން ފެން ބޮޑުވެފައެވެ.
