ފުލުހުންނަށް ހުށަހެޅޭ މައްސަލަތަކުގެ ތެރެއިން ޖެންޑާ މިނިސްޓްރީއާ ގުޅުން ހުރި މައްސަލަތައް އަވަސްކޮށްދިނުމަށް އެދިވަޑައިގެން، ޖެންޑާ މިނިސްޓަރު ޝިދާތާ ޝަރީފް ޕޮލިސް ކޮމިޝަނާ މުހައްމަދު ހަމީދާ ބައްދަލުކުރައްވައިފިއެވެ.
ޖެންޑާ މިނިސްޓްރީން ބުނީ އެ މިނިސްޓްރީއާ ގުޅުން ހުރި ހައްސާސީ މައްސަލަތަކުގެ ތަހުގީގު އަވަސްކުރުމާއި ދެ ފަރާތުން ގުޅިގެން ކުރެވޭ މަސައްކަތްތައް ހަރުދަނާ ކުރުމާ ގުޅޭ ގޮތުން މިނިސްޓަރު ޝިދާތާ ކޮމިޝަނާ އޮފް ޕޮލިހާއި މަޝްވަރާކުރެއްވި ކަމަށެވެ.
މި ބައްދަލުކުރެއްވުމުގައި މިނިސްޓްރީއަށް ހުށަހެޅޭ މައްސަލަތަކާއި ގުޅޭގޮތުންނާއި، އެ މައްސަލަތައް އަވަސްކޮށް ތަހުގީގު އަވަސް ކޮށްދިނުމަށް މަޝްވަރާ ކުރައްވައިފައިވެއެވެ.
ޝިދާތާ، ކޮމިޝަނަރު ހަމީދާއި މިއަދު ބައްދަލުކުރައްވާފައިވާ އިރު، ފަހަކަށް އައިސް ހުށަހެޅޭ ގެވެށި އަނިޔާގެ މައްސަލަތާއި، ކުޑަކުދިންނަށް އަނިޔާ ކުރާކަމުގެ މައްސަލަތައް ވަނީ އިތުރުވެފައެވެ. އެގޮތުން ފާއިތުވި ދެ މަހުގެ ތަފާސް ހިސާބުތަކަށް ބަލާއިރު، މިދިޔަ މަހު ކުޑަކުދިންނަށް އަނިޔާކުރި ކަމުގެ 113 މައްސަލައެއް ވަނީ ހުށަހެޅިފައެވެ. މިއީ މިދިޔަ މަހު ހުށަހެޅުމު މައްސަލަތަކުގެ 55 ޕަސެންޓެވެ.
