އޮޕަރޭޝަންސްތަކުގައި ހަރަކާތްތެރިވާ ފުލުހުންގެ ޔުނީފޯމްގައި ސާވިސް ނަންބަރާއި ނަން މިއަދުން ފެށިގެން ބޭނުން ކުރަން ނިންމައިފިއެވެ.
މީގެ ކުރިން ފުލުހުން އެކި އޮޕަރޭޝަންތަކުގައާއި، މުޒާހަރާތަކުގައި ހަރަކާތްތެރި ވަނީ އެމީހުންގެ ސާވިސް ނަންބަރާއި ނަން އޮންނަ ޓެގްކޮޅު ނަގައިގެންނެވެ. އަދި މި މައްސަލައިގައި ފުލުހުންނަށް އާންމުން ވަރަށް ބޮޑަށް ފާޑުކިޔާފައިވެއެވެ.
ފުލުހުންގެ ސާވިސް ނަންބަރާއި ނަން ފެންނަ ގޮތަށް ބަހައްޓަން ނިންމިކަން ހާމަކުރައްވައި ކޮމިޝަނާ އޮފް ޕޮލިސް މުހައްމަދު ހަމީދު ކުރެއްވި ޓްވީޓެއްގައި ވިދާޅުވީ މިއީ ފުލުހުންގެ ޒިންމާދާރުކަން އިތުރުކުރުމުގެ ގޮތުން ނިންމެވި ކުޑަ އެހެންނަމަވެސް ވަރަށް މުހިންމު ނިންމެވުމެއް ކަމަށެވެ.
"މި ނަންބަރަކީ ކޮންމެ ފުލުހަކަށް ވަކިން ދީފައިވާ ނަންބަރެއް. މިއީ ފުލުހުންގެ ޒިންމާއާއި ވާޖިބު އަދާކުރުމަށް ކޮންމެ ފުލުހެއްގެވެސް އައިޑެންޓިޓީ މުހިންމު" ހަމީދު ކުރެއްވި ޓްވީޓުގައި ވިދާޅުވިއެވެ.
މިއީ ފުލުހުންގެ މުއައްސަސާއާއި މެދު އޮންނަ އިތުބާރު ދަމަހައްޓާ ފުލުހުންނަކީ އިތުބާރު ހިފޭ ބަޔަކަށް ހެދުމަށް ކުރަމުންދާ މަސައްކަތުގެ ތެރެއިން ކުރި ކަމެކެވެ. އާ ސަރުކާރު އައި ފަހުން ފުލުހުންގެ މުއައްސަސާއަށް އަންނަނީ ތަފާތު ބަދަލުތައް ގެންނަމުންނެވެ.
