ކުޑަކުއްޖަކު ލައްވާ ހަށިވިއްކި މައްސަލައެއް މިދިޔަ މަހު ހުށަހެޅުނު: ޖެންޑާ

ކުޑަކުއްޖަކު ލައްވާ ހަށިވިއްކި މައްސަލައެއް މިދިޔަ މަހު ޖެންޑާ މިނިސްޓްރީއަށް ހުށަހެޅުނު ކަމަށް އެ މިނިސްޓްރީން ހާމަކޮށްފިއެވެ.

ޖެންޑާ މިނިސްޓްރީން އާންމުކުރި އެ މިނިސްޓްރީގެ ތަފާސް ހިސާބުތަކަށް ބަލާއިރު، ނަހަމަ ގޮތުގައި ވިޔަފާރި ފައިދާއަށް ޖިންސީ ބޭނުން ހިފުވުމުގެ އެއް މައްސަލަ ހިމެނެއެވެ. ނަމަވެސް މި މައްސަލައިގެ ތަފްސީލެއް އެ މިނިސްޓްރީން ދީފައެއް ނުވެއެވެ.

އެޕްރީލް މަހުގެ ތަފާސް ހިސާބުތަކަށް ބަލާއިރު ޖެންޑާއަށް ރިޕޯޓް ކުރެވުނު 206 މައްސަލަ އިގެ ތެރެއިން 55 ޕަސެންޓް މައްސަލަތަކަކީ ކުޑަކުދިންނަށް ކުރާ އެކި ބާވަތުގެ އަނިޔާގެ މައްސަލައެވެ. އެގޮތުން ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 113 މައްސަލަ މިދިޔަ މަހު ވަނީ ރިޕޯޓުކޮށްފައެވެ. މިއީ އެޕްރީލް މަހު ރިޕޯޓުކޮށްފައިވާ ޖުމްލަ މައްސަލަތަކުގެ 55 ޕަސެންޓްކަމަށް ޖެންޑާއިން ބުނެެެވެ.

އެ މިނިސްޓްރީން ބުނީ ކުޑަކުދިންނަށް ކުރާ އަނިޔާގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައި ވަނީ އިހުމާލުވުމުގެ މައްސަލަތައް ކަމަށާއި، އެ ގޮތުން އިހުމާލުވުމުގެ 37 މައްސަލަ ރިޕޯޓުކޮށްފައިވާ ކަމަށެވެ. މީގެ އިތުރުން ޖިންސީ ހާނީއްކައިގެ 22 މައްސަލަ، ނަފްސާނީ ހާނީއްކައިގެ 22 މައްސަލަ، ގެވެށި އަނިޔާ ކުރާތަން ދެއްކުން ނުވަތަ ފެނުމުގެ 5 މައްސަލަ، އެހެން ކުދިންގެ ފަރާތުން ގަނާލިބުމުގެ އަދި ފުރައްސާރައިގެ ޝިކާރައަކަށްވުމުގެ 4 މައްސަލަ ހުށަހެޅިފައިވެއެވެ.

މީގެ އިތުރުން ހައްގުތަކުން ކުޑަކުދިން މަހުރޫމު ކުރުމުގެ 10 މައްސަލަ މިދިޔަ މަހު ރިޕޯޓްކޮށްފައި ވެއެވެ. އޭގެ ތެރޭގައި ބޯހިޔާވެހިކަން ފޯރުކޮށް ނުދިނުމުގެ 4 މައްސަލަ، ތައުލީމަށް ހުރަސް އެޅުމުގެ 4 މައްސަލަ، އުފަންވުން ރަޖިސްޓްރީނުކުރުމާ ބެހޭ 1 މައްސަލަ އަދި ވެކްސިން ނުދިނުމުގެ 1 މައްސަލަ ހިމެނެއެވެ.

އާއިލީ މައްސަލަތަކުގެ 18 މައްސަލަ މިދިޔަ މަހު މިނިސްޓްރީއަށް ވަނީ ހުށަހަޅާފައެވެ. މި މައްސަލަތަކުގެ ތެރޭގައި ކުދިންނާ ބައްދަލުނުކުރެވޭ 14 މައްސަލައާއި ދަރިންގެ ހަރަދު ދިނުމުގައި ދިމާވާ 3 މައްސަލަ އަދި ކުދިން ބެލުމުގައި ދިމާވާ 1 މައްސަލަ ހިމެނެއެވެ.

އެކި ބާވަތުގެ ކުށްކުރާ ކުޑަކުދިންގެ 4 މައްސަލަ މިދިޔަ މަހު ހުށަހެޅިފައިވާ އިރު، މީގެ ތެރޭގައި ހިމެނެނީ މާރާމާރީ ހިންގުމުގެ 1 މައްސަލައެވެ. އަދި ކުޑަކުދިންގެ އަހުލާގާ ގުޅުން ހުރި 12 މައްސަލައެއް ހުށަހެޅިފައިވާ އިރު، މި މައްސަލަތަކުގެ ތެރޭގައި ސްކޫލަށް ދާން ބޭނުންނުވުމުގެ 3 މައްސަލައާއި އެހެން ކުދިންނަށް ގަނާކުރުމާއި ފުރައްސާރަ ކުރުމުގެ 3 މައްސަލަ އަދި ގެއިން ނުކުމެގެން ދިޔުމުގެ 2 މައްސަލަ ހިމެނެއެވެ. މީގެ އިތުރުން ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާ 30 މައްސަލަ މިދިޔަ މަހު މިނިސްޓްރީއަށް ވަނީ ހުށަހަޅާފައެވެ. މީގެ ތެރެއިން އެންމެ ގިނައިން ރިޕޯޓުކޮށްފައި ވަނީ އެކި ބާވަތުގެ ޖިސްމާނީ އަނިޔާކުރުމުގެ މައްސަލަތަކެވެ. މި ބާވަތުގެ 12 މައްސަލަ މި މުއްދަތުގެ ތެރޭގައި ރިޕޯޓުކޮށްފައިވެއެވެ.

މީގެ އިތުރުން ބިރުދެއްކުމުގެ ގޮތުން ކުރެވޭ ކަންކަމާ ގުޅޭ 7 މައްސަލައާއި ޖިންސީ ހާނީއްކަކުރުމުގެ 6 މައްސަލައާއި ނަފްސާނީ އަނިޔާކުރުން ނުވަތަ އަނގަބަހުން ކުރެވޭ އަނިޔާގެ 4 މައްސަލަ އަދި އިހުމާލުވުމުގެ 1 މައްސަލަ ވަނީ ރިޕޯޓްކޮށްފައެވެ.

ޖުމްލަ 206 މައްސަލައެއް މިދިޔަ މަހު ހުށަހެޅުނު އިރު މާޗްމަހު ޖެންޑާ މިނިސްޓްރީއަށް 253 މައްލައެއް ހުށަހެޅުނެވެ. އެހެންކަމުން ނިސްބަތުން ހުށަހެޅުނު މައްސަލަތައް ވަނީ މަދުވެފައެވެ. ނަމަވެސް ކުޑަކުދިންނަށް ކުރާ އަނިޔާގެ މައްސަލަތައް މަދު ނުވެއެވެ.