ރޯދަމަހުގެ ދެވަނަ ހަފްތާ ތެރޭގައި 814 އުޅަނދެއްގައި ޕާކިން ވައިލޭޝަން ސްޓިކާ ޖަހާފައިވާ ކަމަށް ފުލުހުންގެ ތަފާސް ހިސާބުތަކުން ދައްކައިފިއެވެ.
ކޮންމެ ހަފްތާއަކު އެއްފަހަރު ފުލުހުން އާންމުކުރާ ތަފާސް ހިސާބުތަކަށް ބަލާ އިރު، މެއި 11، އިން 17 އަށް 814 އުޅަނދެއްގައި ސްޓިކާ ޖަހާފައިވާ އިރު، 28 އުޅަނދެއްވަނީ ޓޯކޮށްފައެވެ. އެއީ 12 ކާރާއި 16 ސައިކަލެވެ.
އޭގެ ކުރީ ހަފްތާގައި ގަވާއިދާ ހިލާފަށް ޕާކްކޮށްގެން 776 އުޅަނދެއްގައި ސްޓިކާ ޖަހާފައިވެއެވެ. ވައިިލޭޝަން ފީގެ ގޮތުން ބަލާނަމަ މިއީ 582،000 ރުފިޔާއެވެ. އަދި މިދިޔަ ހަފްތާގައި ސްޓިކާ ޖެހި 814 އުޅަނދުގެ ވައިލޭޝަން ފީގެ ގޮތުގައި 610،500 ރުފިޔާ އަރާނެއެވެ.
ފުލުހުންގެ ތަފާސް ހިސާބު ދައްކާގޮތުން ރޯދަމަހުގެ ދެވަނަ ހަފްތާގައި، މާލޭގައި ހިނގި އެކްސިޑެންޓްތަކުގެ އަދަދު މަދު ނުވެ، އަނިޔާވި މީހުންގެ އަދަދު އޭގެ ކުރީ ހަފްތާއަށްވުރެ ދެގުނަ އިތުރެވެ. އެގޮތުން މިދިޔަ ހަފްތާގައި 54 އެކްސިޑެންޓެއް ހިނގައި 20 މީހަކަށް އަނިޔާވެފައިވެއެވެ. އޭގެ ކުރީ ހަފްތާގައި 56 އެކްސިޑެންޓް ހިނގި އިރު، އެކްސިޑެންޓްތަކުގައި އަނިޔާ ލިބުނީ 11 މީހަކަށެވެ.
ފުލުހުންގެ ތަފާސް ހިސާބުތައް ދައްކާ ގޮތުން މިދިޔަ ހަފްތާގައި 502 އުޅަނދެއް ހުއްޓުވާފައިވެއެވެ. މީގެ ތެރޭގައި ހިމެނެނީ ލައިސަންސް ނެތި ދުއްވި 89 މީހަކާއި، ލައިސަންސް ކާޑު އަތުގައި ނެތި ދުއްވި 47 މީހަކާއި، ދެމީހުނަށް ވުރެ ގިނައިން އަރުވައިގެން ސައިލަކް ދުއްވި އެއް މައްސަލަ ހިމެނެއެވެ.
މީގެ އިތުރުން ރޯޑުވާދިނަސްގެ 19 މައްސަލައަކާއި، އަހަރީ ފީގެ 25 މައްސަލައެއް އަދި އިންޝިއުރަންސްގެ 18 މައްސަލައެއް ހިމެނެއެވެ. އަދި ޓްރެފިކް ލައިޓް ފެޅުމާއި ވަންވޭ ފެޅުމުގެ މައްސަލައިގައި 11 މީހަކު ހުއްޓުވާފައިވާ އިރު، 18 އަހަރުން ދަށުގެ ދެ ކުއްޖަކު ސައިކަލް ދުއްވި މައްސަަލައެއްގެ އިތުރުން ބާރު ސްޕީޑުގައި ދުއްވައިގެން 13 މީހަކު ވަނީ ހުއްޓުވާފައެވެ.
