ލ. މާވަށުގައި ބަނދަރުކޮށްފައި އޮތް ކޮޅުވެއްޓިއެއްގައި ދިވެއްސަކު މަރުވެފައި އޮއްވާ ފެނިއްޖެއެވެ.
"ދަޕްރެސް" އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ މާވަށުގައި ބަނދަރުކޮށްފައި އޮތް ކޮޅުވެއްޓިއެއްގައި ދިވެއްސަކު މަރުވެފައި އޮތްކަމުގެ ރިޕޯޓް ރޭ ދަންވަރު ލިބިފައިވާ ކަމަށެވެ. މީޑިއާ އޮފިޝަލް ވިދާޅުވީ މަރުވެފައިވަނީ 59 އަހަރުގެ ދިވެއްސެއް ކަމަށާއި، އޭނާ މަރުވެފައިވަނީ ގުދުރަތީ މަރަކުން ކަމަށެވެ. މައުލޫމާތު ލިބިފައިވާގޮތުގައި މަރުވެފައިވަނީ އޭދަފުށްޓަށް ނިސްބަތްވާ އަހުމަދު ނަސީމް ކިޔާ މީހެކެވެ. އަދި އޭނާ އަކީ އެ ކޮޅުވެއްޓީގެ ކެޕްޓަނެވެ.
"ރޭ ދަންވަރު 3:24 ހާއިރު، ފުލުހުންނަށް ރިޕޯޓް ލިބުނީ. އެމީހާ ވަގުތުން ހޮސްޕިޓަލަށް ގެންދެވި، އޭނާ ބެއްލެވި ޑޮކްޓަރު ވިދާޅުވީ ގުދުރަތީ މަރެއް ކަމަށް" ފުލުހުންގެ މީޑިއާ އޮފިޝަލް ވިދާޅުވިއެވެ.
މި ކޮޅުވެއްޓިއަކީ ގއ. އަތޮޅުގައި ހަދަމުންދާ ރިސޯޓަކަށް މުދާ ހިފައިގެން ގޮސް ހުސްކުރުމަށްފަހު، އެނބުރި ތިލަފުށްޓަށް ދިއުމުގެ މަގުމަތީގައި މާވަށުގައި މަޑުކުރި ކޮޅުވެއްޓިއެކެވެ. މި ކޮޅުވެއްޓިއަކީ އޭޑީކޭ ކޮމްޕެނީގެ ކޮޅުވެއްޓިއެކެވެ.
