އިސްލާމިކް މިނިސްޓްރީން މީހުން ހައްޖަށް ގެންދިއުމުގެ ހުއްދަ ކުންފުނިތަކަށް ދިނީ އިންސާފު ވެރިކަމާ އެކު ނޫން ކަމަށް ބުނެ، އިސްލާމިކް މިނިސްޓްރީން ކަނޑައެޅި ގޮތް ބާތިލު ކުރަން ސިސިލްފަރު ހައްޖު އެންޑް އުމްރާ ގްރޫޕުން ސިވިލް ކޯޓަށް ހުށަހެޅި މައްސަލައިގެ ޝަރީއަތް މިއަދު 11 ޖަހާއިރަށް ސިވިލް ކޯޓުގައި ތާވަލުކޮށްފިއެވެ.
ހައްޖަށް މީހުން ގެންދިއުމަށް ނިންމިގޮތް ބާތިލް ކުރުމުގެ މައްސަލައިގެ ޝަރީއަތެއް ބާއްވަނީ، މި މައްސަލަ ޑިސްޕިއުޓް މަރުހަލާގައި ހައްލު ނުވުމުންނެވެ. ޑިސްޕިއުޓް ރިޒޮލިއުޝަން މަރުހަލާގެ ފުރަތަމަ އަޑުއެހުން ބުދަ ދުވަހު ވަނީ ބާއްވާފައެވެ. އެދުވަހު ދައުލަތުން މި މައްސަލައިގައި ޖަވާބުދާރީ ވެފައި ނުވެއެވެ.
ހައްޖަށް މީހުން ގެންދިއުމުގެ ހުއްދަ ދިނުމަށް ކުންފުނިތައް ހޮވި އިރު، ސިސިލްފަރު ގްރޫޕަކީ 35 އަހަރު ވާންދެން މީހުން ހައްޖަށް ގެންދިޔަ ކުންފުންޏެއް ކަމުގައި ވިޔަސް، ތަޖުރިބާ އަށް އެ ކުންފުންޏަށް ލިބިފައިވަނީ އެންމެ 0.7 ޕަސަންޓު މާކްސްއެވެ. ސިސިލްފަރުން އިސްލާމިކް މިނިސްޓްރީއާ ދެކޮޅަށް ކޯޓަށް ހުށަހެޅި މައްސަލައިގައި ހައްޖަށް މީހުން ގެންދިއުމުގެ ހުއްދަ ދިނުމަށް ކުންފުނިތައް ހޮވުމަށް ކުރިއަށް ގެންދިޔަ އިވެލުއޭޝަން ޕްރޮސެސް ސައްހަ ނޫން ކަމަށް ކަނޑައަޅައިދިނުމަށް އެދިފައި ވެއެވެ.
ހައްޖަށް މީހުން ގެންދިއުމުގެ މައްސަލައިގައި ސިސިލްފަރުން ސިވިލް ކޯޓަށް މައްސަލައެއް ހުށަހަޅާ އެ މައްސަލައިގައި ފުރަތަމަ އަޑުއެހުން މިއަދު ތާވަލުކުރި އިރު، އިސްލާމިކް މިނިސްޓްރީން ވަނީ ހައްޖަށް ގެންދާ ކުންފުނިތައް ކަނޑައަޅައި އެކުންފުނިތަކާއި އެކު ސޮއި ވެސް ކޮށްފައެވެ.
