އައިޖީއެމްއެޗް ގައި ޗިކުންގުންޔާ އަށް ފަރުވާ ދެމުންދާ ދެކުދިންގެ ސިކުނޑި އިންފެކްޓްވެފައިވާ ކަމަށް ކުޑަކުދިންގެ ހާއްސަ ޑޮކްޓާ ޑރ، އަހުމަދު ފައިސަލް ވިދާޅުވެއްޖެއެވެ.
މަދިރީގެ ޒަރިއްޔާއިން ޖެހޭ މި ނުރައްކާތެރި ބަލީގެ ސަބަބުން އެ ދެ ކުދިންގެ ސިކުނޑި އިންފެކްޓުވެ ހާލު ސީރިއަސް ކަމަށް ޑރ. ފައިސަލް ވަނީ ވިދާޅުވެފައެވެ. ފައިސަލް ކުރެއްވި ޓްވީޓުގައި ވަނީ މި ދެކުދިންނަށް އަވަސް ޝިފާއަކަށް އެދި ދުވާ ކޮށް ދިނުމަށް އެދިފައެވެ. މީގެ އިތުރުން މަދިރި އާލާވާގޮތަށް ހުންނަ ތަންތަން ނައްތާލުމަށް ޑރ. ފައިސަލް ވަނީ އިލްތިމާސް ކުރައްވާފައެވެ.
މިކަމާ ގުޅޭގޮތުން އައިޖީއެމްއެޗުން އިތުރު މައުލޫމާތެއް ދީފައެއް ނުވެއެވެ.
މި ދުވަސް ކޮޅަކީ މަދިރީގެ ޒަރިއްޔާއިން ޖެހޭ ނުރައްކާތެރި ދެ ބަލި ކަމުގައިވާ ޑެންގޫ އަދި ޗިކުންގުންޔާ ފެތުރެމުންދާ ދުވަސްކޮޅެއް ކަމުން މަދިރީގެ ޒަރިއްޔާއިން ޖެހޭ ބަލިތަކުން ރައްކާތެރި ވުމަށް އެޅެން ހުރި ފިޔަވަޅުތައް އެޅުމަށް ކަމާބެހޭ ފަރާތަކުން ދަނީ އިލްތިމާސް ކުރަމުންނެވެ.
