ރަމަޟާން މަހުގެ ރޭތައް އިހްޔާކުރުމަށް ކާށިދޫ ދާއިރާއަށް އިންތިހާބުވެ ވަޑައިގެންފައިވާ އަބްދުﷲ ޖާބިރު ބާއްވަވާ އިހްޔާ ޕްރޮގްރާމަށް ޑރ. މުހައްމަދު ޝަހީމް އަލީ ސައީދު ވަޑައިގަންނަވާނެ ކަމަށް އެމަނިކުފާނު ވިދާޅުވެއެޖެއެވެ.
މިކަމާ ގުޅޭގޮތުން ކުރެއްވި ޓްވީޓެއްގައި ޝަހީމް ވިދާޅުވެފައި ވަނީ ޖާބިރު އެ ދާއިރާގެ ރައްޔިތުންނަށް ހާއްސަކޮށްގެން ބާއްވަވާ ރޯދަ މަހުގެ ރޭތަށް އިހްޔާ ކުރުމުގެ ޕްރޮގްރާމުގައި ތަގްރީރު ކުރެއްވުމަށް ދައުވަތު އަރުވާފައި ވާތީ ޝުކުރުވެރި ވެލައްވާ ކަމަށާއި، ދައުވަތު ގަބޫލުކުރައްވާ ކަމަށެވެ.
ޖާބިރު ރައްޔިތުން މަޖިލީހަށް އިންތިހާބު ވެވަޑައިގަތުމަށް ފަހު އެ ދާއިރާގެ ރައްޔިތުންނަށް އިޖްތިމާއީ އަދި ދީނީ ގޮތުން އެހީތެރިކަން ފޯރުކޮށްދިމުގެ މަސަތްކަތް ވަނީ ފަށްޓަވާފައެވެ. އެގޮތުން ގާފަރުގެ މަސްޖިދުލް މުހުތަގީމް މިސްކިތުގައި އޭސީ ހަރުކޮށްދިނުމާ، އެ މިސްކިތުގައި ހިނަވާގެއް ގާއިމް ކޮށްދިނުމުގެ އިތުރުން "ޖާބިރު ފުޓްސަލް ކަޕް" ގެ ނަމުގައި ޗެމްޕިއަން ޓީމަށް އެއްލައްކަ ރުފިޔާ ލިބޭ ފުޓްސަލްކަޕެއްވެސް ކާށިދޫ އަދި ގާފަރުގައި ބޭއްވުމަށް ހަމަޖެހިފައި ވާކަމަށް މައުލޫމާތު ލިބެއެވެ.
