މިފްކޯ އިން މި ރޯދަ މަހު، 8000 އަށް ވުރެ ގިނަ މަސްދަޅު ކޭސް ވިއްކައިފިއެވެ.
މިފްކޯ އިން ބުނީ މިވީ ދެތިން ދުވަސް ތެރޭގައި ވަރަށް ބާރު ބޮޑު ކޮށް މަސްފިހާރަތަކުން މަސްދަޅު ކޭސްތައް ވިކުނު ކަމަށެވެ. ނަމަވެސް، މިހާރު ފިހާރަތަކަށް އެހާ ބާރު ބޮޑު ނޫން ކަމަށެވެ. މިދިޔަ އަހަރާއި އަޅާ ބަލާއިރު މަސްދަޅުގެ ވިޔަފާރި ރަނގަޅު ކަމަށާއި މިދިޔަ އަހަރާއި ހިލާފަށް މިއަހަރު މަސްދަޅު ކޭސް ލިމިޓް ކުރަން ނުޖެހޭ ކަމަށް ވެސް މިފްކޯ އިން ބުނެއެވެ.
މިފްކޯ އަކީ ރޯދަ މަހަށް ހާއްސަ ކޮށްގެން ތަފާތު އުފެއްދުންތައް މާކެޓަށް ނެރޭ ކުންފުންޏެކެވެ. އެގޮތުން މިއަހަރު މިފްކޯއިން ރޯދަޔަށް ހާއްސަކޮށް މާކެޓަށް ނެރުނީ ކަޓްލް ފިޝްގެ އާ އުފެއްދުންތަކެކެވެ. ކަޓްލް ފިޝްގެ ހަތަރު އުފެއްދުމެއް މާކެޓަށް ނެރެފައި ވާއިރު، އެއީ ކަނޑުތަކުގެ މުއްސަނދިކަން އެންމެ ފުރިހަމައަށް ބޭނުން ކުރުމުގެ ގޮތުން ފިޝަރީސް މިނިސްޓްރީން ކަޓުލް ފިޝް ނުވަތަ ތުތިބޯވަދިލަމަސް އާލާކުރުމަށް ހުޅުވާލި ފުރުސަތުގައި އެ މީހުން ބާނާ ކަޓުލް ފިޝް ބޭނުންކޮށްގެން ތައްޔާރުކޮށްފައިވާ އުފެއްދުންތަކެވެ.
ފަސްމީރު ބްރޭންޑުގެ އެހެން އުފެއްދުންތަކެކޭ އެއްގޮތަށް ކަޓުލް ފިޝްގެ އުފެއްދުންތައް މާލެއިންނާއި ހުޅުމާލޭ މަސްފިހާރައިން ވެސް ލިބޭނެ ކަމަށް މިފްކޯ އިން ބުނެއެވެ.
