"ދަ ވޮއިސް އިންޑިއާ"ގެ ފަނޑިޔާރުންގެ ގޮތުގައި ހަރަކާތްތެރިވާ މަޝްހޫރު ލަވަކިއުންތެރިޔާ އަދުނާން ސާމީއާއި އަރުމާން މަލިކާ ދެމެދު، ސެޓްގައި ވަރުގަދަ ޒުވާބުތަކެއް ކޮށް، އަރުމާނު މަލިކު ދެކެ ރުޅިއައިސްގެން އަދުނާނު ސާމީ ސެޓް ދޫކޮށް ދިޔަކަމަށް ބުނެ ދައުރުވަމުންދާ ޚަބަރުތަކަކީ "ކުނި" ޚަބަރުތަކެއްގެ ގޮތުގައި އަރުމާނު މަލިކު ސިފަކޮށްފައެވެ.
މިކަމާ ބެހޭ ގޮތުން އަރުމާނުގެ ކޮމެންޓެއް ހޯދުމަށް އިންޑިއާގެ ޚަބަރުފަތުރާ އިދާރާތަކުން މަސައްކަތް ކުރުމުން، އެ ވާހަކަތަކަކީ އެއްވެސް ހަގީގަތެއް އެކުލެވިގެން ނުވާ "ބޭކާރު" ވާހަކަތަކެއް ކަމުގައި އަރުމާން މަލިކު ވަނީ ބުނެފައެވެ.
އިންޑިއާގެ މުނިފޫހިފިލުވުމުގެ ދާއިރާގެ ޚަބަރުތައް ބުނާ ގޮތުގައި އަދުނާން ސާމީއާއި އަރުމާނު މަލިކަކީ ގޮތް ނިންމުމުގައި އެކަކު އަނެކަކާ ހަތަރުކަޅިވެސް ހަމަކުރާ ދެ ފަންނާނުނެއް ނޫނެވެ. "ދަ ވޮއިސް އިންޑިއާ"ގެ ފަނޑިޔާރުންގެ ޕެނަލުގައި މި 2 ލަވަކިއުންތެރިންނާއެކު ދެން މަސައްކަތްކުރަނީ ހަރްޝްދީޕު ސިންހްއެވެ.
ބޮލީވުޑްގެ ބައެއް ޚަބަރުތައް ބުނާ ގޮތުގައި އަދުނާން ސާމީ އާއި އަރުމާން މަލިކާ ދެމެދު ބަހުގެ ހަމަލާތަކެއް ބަދަލުކޮށްފައިވަނީ، ޝޯ ކުރިއަށްދިޔަ މާލަމަށް ދެމީހުން އެކުގައި ވަންނަން އަރުމާން މަލިކު ބޭނުންވި ހިސާބުންނެވެ.
