މިނިސްޓްރީ އޮފް ފިޝަރީޒް، މެރީން ރިސޯސަސް އެންޑް އެގްރިކަލްޗާ އަދި ނޭޝަނަލް ބިއުރޯ އޮފް ސްޓެޓިސްޓިކްސް (އެންބީއެސް) އާ ގުޅިގެން ރާއްޖޭގައި ފުރަތަމަ ފަހަރަށް ދަނޑުވެރިކަމުގެ ސާވޭއެއް އެބަ ކުރެއެވެ.
މިދިޔަ ހުކުރުދުވަހުން ފެށިގެން އަންނަ މަހު ހަތަރެއްގެ ނިޔަލަށް ކުރިއަށް ގެންދާ މި ސާވޭ ކުރިއަށްދަނީ ރާއްޖޭގެ 11 ރަށެއްގައެވެ. މި 11 ރަށުގެ ތެރޭގައި ހއ.ކެލާ، ޅ.ނައިފަރު ކ.ކާށިދޫ، އއ.ތޮއްޑޫ އަދި އދ.މާމިގިލީގެ އިތުރުން ފ.މަގުދޫ ހިމެނެއެވެ. އަދި މީގެ އިތުރުން ލ.ފޮނަދޫ، ލ.ގަން، ގދ.ގައްދޫ އަދި ޏ.ފުވައްމުލައް އަދި ސ.މީދޫ ވެސް ހިމެނެއެވެ. މި ރަށްތައް ހޮވާފައިވަނީ ތަފާތު ވައްތަރުގެ އަދި ތަފާތު ލެވެލްގެ ދަނޑުވެރިކަން ކުރާ ރަށްތައް ތަމްސީލުކުރާ ފަދަ ރަށްތަކަށް ބަލައިގެންނެވެ.
މި ސާވޭގެ މައިގަނޑު މަގްސަދަކީ ދެމެހެއްޓެނިވި ގޮތެއްގައި ދަނޑުވެރިކަން ތަރައްގީކުރުމަށް ބޭނުންވާ މައުލޫމާތު ހޯދައި ދަނޑުވެރިކަން ކުރިއެރުވުމެވެ. އަދި ދަނޑުވެރިކަމުގެ ކުރިމަގު ރޭވުމުގައި ހަރުދަނާ ތަފާސްހިސާބުގެ ނިޒާމެއް ތައްޔާރު ކުރުމަށް ކަމަށް ފިޝަރީޒް މިނިސްޓްރީން ބުނެއެވެ. އެ މިނިސްޓްރީން ބުނާ ގޮތުގައ މި ސާވޭއިން އެއްކުރެވޭ މައުލޫމާތުގެ އަލީގައި ރާއްޖޭގެ ދަނޑުވެރިކަމުގެ ހާލަތު ދެނެގަނެ، ދަނޑުވެރިކަމާއި ގުޅޭ ގައުމީ ސިޔާސަތުތައް އެކުލަވާލުމުގައި ފަސޭހަކަމެއް ލިބިގެންދާނެއެވެ.
