އަލް އަބްރާރް ގްރޫޕުގެ ހަވާލުގައި އުމްރާއަށް ފުރަން ހަމަޖެއްސުއްމަށްފަހު ފަހު ވަގުތު ދަތުރު ކެންސަލް ކޮށްލި މައްސަލައިގައި ހިމެނޭ މީހުންގެ ތެރެއިން 28 މީހަކު ހައްޖު ކޯޕަރޭޝަން ގްރޫޕުގެ ދަށުން މިއަދު އުމްރާއަށް ފުރުވާލައިފިއެވެ.
އަލް އަބްރާރް ގްރޫޕުން އުމްރާއަށް ފުރަން ހަމަޖެހިފައިވާ މީހުންގެ ދަތުރު ކެންސަލް ކުރި މައްސަލައިގައި ރޭ އެ ގްރޫޕްގެ އޮފީސް ކައިރިއަށް މީހުން އެއްވެ ވަނީ ކަންބޮޑުވުން ފާޅުކޮށްފައެވެ. މި މައްސަލަ ފެންމަތިވީއިރު ރޭ ފުރަން ހަމަޖެހިފައިވާ 110 މީހަކަށް ނުފުރިގެން ކަންބޮޑުވުން ވަނީ ފާޅުކޮށްފައެވެ.
އެ ސަރަހައްދުގައި ތިބި މީހުން ބުނެފައިވާ ގޮތުގައި އުމްރާ އަށް ފުރުމުގެ ކުރިން އެ ދުވަހުގެ ހެނދުނު ދަބަސްތައް ގެންދިއުމަށް އެންގި ކަމަށާއި ފަހުން އެންގީ އެއާޕޯޓަށް ދަމުން ދަބަސް ގެންދިއުމަށް ކަމަށެވެ، އެ އެންގުމަށް ފަހު، ގްރޫޕުން ވަނީ ކުއްލި ބައްދަލުވުމެއް ބާއްވާފައި ކަމަށާއި އުމްރާ ދަތުރު ކެންސަލް ކުރިކަން އެ ބައްދަލުވުމުގައި އަންގައި ސަބަބެއް ކަމަށް ބުނީ، މިހާރު މެދުއިރުމަތީގައި ހިނގަމުންދާ ހަނގުރާމަ އަށް މި މަހުގެ 26 ގެ ފަހުން ވެސް ވާނެ ގޮތެއް ނޭނގޭތީ ކަމަށެވެ.
އެ 110 މީހުންގެ ފުރުން ކެންސަލް ކުރިއިރު، އެ އެންމެން ވެސް ތިބީ ރޯދަ އުމުރާއަށް ދިއުމުގެ ހުރިހާ ތައްޔާރީތަކެއް ވެފައި ވުމުން ކުއްލިއކަަކށް ދަތުރު ކެންސަލް ކޮށްލުމާ ގުޅިގެން ހިތްހަމަނުޖެހުނު އާނމްުް ވަނީ މި މައްސަލަ އިސްލާމިކް މިނިސްޓަރު މުހައްމަދު ޝަހީމް އަލީ ސައީދުއާ ހަަމައަށް ގެންގޮސްފައެވެ. އެ މީހުން އުމްރާ އަށް ފުރުމުގެ އިންތިޒާމު ހަމަޖެހިފައިވާ ނަމަ ރޭގައި ފުރުވައިލުމަށާއި އަދި ހަނގުރާމައިގެ ސަބަބުން އުމްރާގެ އަޅުކަމަށް އެއްވެސް ނުރައްކަލެއް ނެތް ކަަމަށް ޝަހީމް ވިދާޅުވެފައި ވާ ކަމަށް ވެއެވެ.
މިކަމާ ގުޅިގެން ހައްޖު ކޯޕަރޭޝަންގެ މެނޭޖިން ޑިރެކްޓަރު މިއަދު ބުނީ، މި އަހަރުގެ ބަރަކާތްތެރި ރަމަޟާން މަހު އުމްރާގެ އަޅުކަމަށް ގެންދާނެ ކަމަށް ބުނެ އަމިއްލަ އުމްރާ ގްރޫޕަކުން ގިނަ ބައެއްގެ އަތުން ފައިސާ ނެގުމަށްފަހު އުމްރާގެ އިންތިޒާމުތައް ހަމަޖައްސާފައި ނުވާތީ އެ ހައްޖު ގްރޫޕުގައި ޖާގަ އޮތް މިންވަރަކުން އުމްރާއަށް ދިއުމުގެ އިންތިޒާމް ހަމަޖައްސާދީފައިވާ ކަމަށެވެ. އެ ގޮތުން 28 މީހުންނަށް ވިސާ ޖަހައި މައްކާ އަދި މަދީނާއިން އެކޮމޮޑޭޝަން، އަދި ކެއިންބުއިމާއި ދަތުރުފަތުރުގެ އެންމެހާ އިންތިޒާމުތައް ހަމަޖައްސައި މިއަދު ހެނދުނު މޯލްޑިވިއަންގެ ފްލައިޓަކުން އެ 28 މީހުން ސައުދީ އަރަބިއްޔާއަށް އުމްރާގެ އަޅުކަމަށް ވަނީ ފުރާފައި ކަމަށް ޝަކީލް ވިދާޅުވިއެވެ.
މި މައްސަލައިގައި އަލް އަބްރާރް އުމްރާ ގްރޫޕުން ބުނެފައި ވަނީ، ރީފަންޑު ދިނުމުގެ މަސައްކަތް ކުރަނީ ދީލަތި ބައެއް ފަރާތްތަކުގެ އެހީއާ އެކުގައި ކަމަށާއި އެއީ އުމްރާއަށް ދިއުމަށް މީހުން ދެއްކި ފައިސާ، އެ މީހުން އުމްރާ އަށް ގެންދިއުމުގެ ކަންކަމަށް ހަރަދު ކޮށްފައި ވާތީ ކަމަށެވެ. އަދި ޓިކެޓާއި ހޮޓެލް ބުކިން އަށް ފައިސާ ދައްކާފައިވާ ކަމަށް އެ ކުންފުނިން ބުނެފައި ވެއެވެ.
އުމްރާއަށް މީހުން ގެންދިއުމުގެ ފަސް ދުވަސް ކުރިން އިސްލާމިކް މިނިސްޓްރީއަށް އުމްރާ ގެންދާ މީހުންގެ ލިސްޓާއި ތިބޭ ހޮޓަލާއި ވިސާގެ މައުލޫމާތު ފޮނުވަން ޖެހެއެވެ. އަލް އަބްރާރް ގްރޫޕުން ބުނީ އެ ޑޮކިއުމަންޓުތައް އިސްލާމިކް މިނިސްޓްރީ އަށް ފޮނުވި ނަމަވެސް އޭގެ މައުލޫމާތެއް އެ މިނިސްޓްރީގައި ނެތް ކަމަށާއި އެހެންކަމުން ހާއްސަ ތަހުގީގެއް ފަށާފައިވާ ކަމަށެވެ.
އިސްލާމިކް މިނިސްޓްރީން ބުނެފައިވާ ގޮތުގައި އަލް އަބްރާރު ގްރޫޕަކީ އުމްރާ އަށް މީހުން ގެންދިއުމުގެ ހުއްދަ އޮތް ކަމަށް އޭޕްރީލް، 2025 ގައި ނެރެފައިވާ ލިސްޓުގައި ވެސް ހިމެނޭ ކުންފުންޏެެއް ކަމަށެވެ.
