ގާތްގަނޑަކަށް 2 އަހަރު ދުވަހުގެ އިންތިޒާރަކަށްފަހު، ފާއިތުވީ 24 ގަޑިއިރެއްހާއިރު ވެފައިވަނީ މަޝްހޫރު ސީރީޒް "ގޭމް އޮފް ތްރޯންސް"ގެ ފޭނުންނަށް އާދަޔާ ހިލާފު އިހުސާސްތަކެއް ކުރުވި ވަގުތުތަކަކަށެވެ.
"ގޭމް އޮފް ތްރޯންސް"ގެ އެންމެ ފަހު ސީޒަންގެ ފުރަތަމަ އެޕިސޯޑް އެޗް.ބީ.އޯއިން ދުރަށް ދައްކާފައިވާއިރު، ދުނިޔޭގެ ބައެއް ހިސާބުތަކުން މި ޝޯ ބަލާފައިވަނީ ހޭލާ ތިބެގެންނެވެ.
ރާއްޖެއަށް ނަޒަރު ހިންގާލާއިރު، ސޯޝަލް މީޑިއާ މިކަމަށް ހެކިދެއެވެ. އެއްބަޔަކު މިހާރުވެސް މި އެޕިސޯޑް ބަލަމުންދާއިރު، އެކި ސަބަބުތަކާއެކު ހެދި އެޕިސޯޑް ނުބެލި ތިބި ބައެއް މީހުން ވަނީ "ސްޕޮއިލާ"އެއް ނޫނީ ކުރިމަރާލަފާނެކަމުގެ ބިރަށް ސޯޝަލް މީޑިއާ އެކައުންޓްތައްވެސް ޑީއެކްޓިވޭޓްކޮށްފައެވެ.
"ގޭމް އޮފް ތްރޯންސް" ސީޒަން 8ގެ ފުރަތަމަ އެޕިސޯޑް ބެލި ބައެއް މީހުން ސިފަކުރި ގޮތުގައި މިއީ ރަނގަޅު ފެށުމެކެވެ. އުއްމީދުކޮށްގެން ތިބި ގިނަ ގުޅުންތަކެއް ބަދަހިވި އެޕިސޯޑެއް ކަމަށް އެއްބަޔަކު ބުނާއިރު، މިފަހަރުގެ "ކިލް ލިސްޓު"އަކީ ސިހުން ގެނުވަނިވި ލިސްޓެއް ކަމަށް ބުނާ ބަޔަކުވެސް އެބައުޅެއެވެ. މިވާގޮތެއް ބެލުމަށް ފޭނުންގެ އަތްމައްޗަށް ދޫކޮށްލާނަމެވެ.
ނޭވާ ހިފަހައްޓާލަންޖެހޭ ހިސާބަކުން ފުރަތަމަ އެޕިސޯޑް ނިންމާލާއިރު، ދެންވާ ގޮތް ބަލަން ދެވަނަ އެޕިސޯޑު ނުބެލި ހަފުތާއެއްހާ ދުވަސް މަޑުކުރަންޖެހޭތީ ގިނަ ބަޔަކު ވަނީ ޝަކުވާކޮށްފައެވެ. ފުރަތަމަ އެޕިސޯޑަކީ 54 މިނެޓުގެ އެޕިސޯޑަކަށްވީއިރު، މިއީ ސީޒަންގެ 8ގެ އެންމެ ކުރު އެޕިސޯޑެވެ.
"ގޭމް އޮފް ތްރޯންސް"އަކީ ފާއިތުވީ 10 ވަރަކަށް އަހަރު ދުވަހުގެ ތެރޭގައި ނިކުތް އެންމެ ކާމިޔާބު އޭ ސީރީޒްއެވެ. ސީޒަން 8ގެ ޓްރޭލާ އާންމުކުރުމާއެކު 24 ގަޑިއިރު ތެރޭގައި 80 މިލިއަނަށްވުރެ ގިނަ މީހުން އެ ކުޑަކުޑަ ޓްރޭލާ ބެލިކަމީވެސް މިކަމުގެ ހެއްކެކެވެ.
