މާ ގިނަ ދުވަހެއް ނުވެ ހޮލީވުޑްގެ ފިލްމަކުން ފެނުމަކީ ކުރަމުންދާ އުއްމީދެއް ކަމަށް ކުޑަ ދުވަސްކޮޅެއްގެ ތެރޭގައި ގިނަ ބައެއްގެ ލޯބި ހޯދި ބޮލީވުޑްގެ ޒުބާން ބަތޮލާ އާލިއާ ބަޓް ބުނެފިއެވެ.
ފިލްމް "ކަލާންކް" ޕްރޮމޯޓުކުރުމުގައި އަވަދިނެތި އުޅެމުންދާ އާލިއާ ބަޓް ބުނީ، ހޮލީވުޑުން ރަނގަޅު ހުށަހެޅުމެއް ލިބިއްޖެނަމަ އެ ފުރުސަތު ބޭނުން ހިފަން ތައްޔާރަށް ހުރި ކަމަށެވެ.
އުމުރުން އެންމެ 26 އަހަރުގެ ބަތޮލާ ބުނީ، ހޮލީވުޑް ފިލްމެއްގައި މަސައްކަތް ކުރުމަކީ މާ ފަސޭހަކަމަކަށް ނުވާނެ ކަމަށާ، އެހެނީ އެއީ މުޅިން ތަފާތު ސިނާއަތަކަށް ވުމުން ކަމަށާ، ނަމަވެސް އިތުރު ވަގުތާއެކު އެކަންވެސް ކާމިޔާބު ކުރާނެ ކަމަށެވެ.
ލޯބިވެރިޔާ ރަންބީރު ކަޕޫރާއެކު ފިލްމް "ބްރާމާސްތްރާ"ގައި، އަދި ސަލްމާން ހާންއާއިއެކު ސަންޖޭ ލީލާ ބަންސާލީގެ ފިލްމެއްގައި މިހާރުވެސް މަސައްކަތް ކުރަމުން އަންނަ އާލިއާ ބަޓް ބުނީ، މިހާރުވެސް އޭނާ އަދާކުރުމަށް އެއްބަސްވެފައިވާ ރޯލުތަކަކީ އުނދަގޫ، އަދި ގޮންޖެހުންތަކަކާ އެކުގައި ނޫނީ އަދާނުކުރެވޭނެ ރޯލުތަކެއް ކަމަށެވެ. ނަމަވެސް ދެކެމުންދާ ތަސައްވުރަކީ، އެ ރޯލުތައްވެސް އެންމެ ފުރިހަމައަށް އަދާކޮށް، ކާމިޔާބު ހޯދުން ކަމަށް އާލިއާ ބުނެއެވެ.
އަލިއާގެ އާދަޔާ ހިލާފު އެކްޓިންގްއެއް ފެނިގެންދާ ފިލްމް "ކަލާންކް" ތިއޭޓަރުތަކުގައި އެޅުވުމަށް ހަމަޖެހިފައިވަނީ މިމަހުގެ 17 ވަނަ ދުވަހުއެވެ.
