ކަންގަނާ ރެނޯޓް ފާޅުކުރާ ހިޔާލާ، އޭނާގެ މައްސައްކަތްތަކަށް އިހުތިރާމުކުރާނެ ކަމަށް ބޮލީވުޑްގެ ޒުވާން ބަތޮލާ އާލިއާ ބަޓް ބުނެފިއެވެ.
"ގަލީ ބޯއީ"ގައި އާލިއާ އަދާކޮށްފައިވާ ރޯލާ ކަންގަނާ އަޅާ ކިއުމަކީ ލަދުގަންނަންޖެހޭ ކަމެއް ކަމަށާ އެ ފިލްމުގައި އާލިއާ ދައްކުވާދީފައިވަނީ އާދައިގެ އެކްޓިންގްއެއް ކަމަށް ބުނެ، ކަންގަނާ ވަނީ އާލިއާއަށް ބަހުގެ ހަމަލާތަކެއް ދީފައެވެ.
ކަންގަނާގެ ވާހަކަތަކަށް ރައްދު ދެމުން އާއިލާ ބުނީ ކަންގަނާއަށް އެފަދަ އިހުސާސް ކުރެވެންވީ ސަބަބެއް އޮންނާނެ ކަމަށެވެ. އަދި "ގަލީ ބޯއީ"އޭ ކިއައިގެން ކަންގަނާ ދެއްކި ވާހަކަތަކުގެ ބަދަލުގައި، ހަނދާނުގައި ބަހައްޓާނީ ފިލްމް "ރާޒީ"ގައި އާލިއާ އަދާކުރި ރޯލަށް ކަންގަނާ ކުރި ތައުރީފުގެ ވާހަކަތައް ކަމަށްވެސް ޒުވާން ބަތޮލާ ވަނީ ބުނެފައެވެ.
މިވަގުތު ސަމާލުކަން ދެވެން އޮތީ މިހާރު ކުރާ މަސައްކަތްތަކަށް ކަމަށާ، ރަނގަޅަށް މަސައްކަތް ކޮށްފިނަމަ މިހާރުގެ މަސައްކަތްތައް ކަންގަނާއަށް ކަމުދިޔުން އެކަށީގެން ވާކަމަށްވެސް އާލިއާ ވަނީ ބުނެފައެވެ.
އާލިއާ ބަޓް މިހާރު އުޅެނީ އޭނާގެ އެންމެ ފަހުގެ ފިލްމް "ކަލާންކް"ގެ ޕްރޮމޯޓު ކުރުމުގެ މަސައްކަތުގައެވެ. މިފިލްމު ރިލީޒް ކުރުމަށް ހަމަޖެހިފައި ވަނީ މި އޭޕްރިލް މަހުގެ 17 ވަނަ ދުވަހުއެވެ.
