ޒަމާންވީ ހަތުރުންގެ ގޮތުގައި އޮތް އިންޑިއާއާއި ޕާކިސްތާނާ ދެމެދު އޮތް ބަލިކަށިގުޅުން މިއަހަރަށް ފެށިފަހުން ވަކިން ބޮޑަށް ހީނަރުވެފައިވާއިރު، އެކަމުގެ އަސަރު މި ދެގައުމުގެ ފިލްމީ ސިނާއަތަށްވެސް ދަނީ ކުރަމުންނެވެ.
އިންޑިއާގެ ފިލްމީ ސިނާއަތް ނުވަތަ ބޮލީވުޑްގެ އުފެއްދުންތަކުން ޕާކިސްތާނަށް އުފަން ފަންނުވެރިންނަށް ފުރުސަތު ނުދިނުމަށް ނިންމާފައިވާއިރު، "ލޮލީވުޑް" ނުވަތަ ޕާކިސްތާނުގެ ސިނަމާ ސިނާއަތް ނެގެހެއްޓުމުގެ ފަހަތުގައި އޮތް އެންމެ ވަރުގަދަ އެއް ބާރަކީ ބޮލީވުޑްގެ އުފެއްދުންތަކެވެ. ނަމަވެސް އިންޑިއާ ދެކެ އަންނަ ރުޅިއެއްގެ ސަބަބުން ޕާކިސްތާނުގެ ސިނަމާތަކުން ބޮލީވުޑް އުފެއްދުންތަކަށްވެސް ދަނީ ފުރަގަސްދެމުންނެވެ.
މިފަދަ ހާލެއްގައި ބޮލީވުޑާ ލޮލީވުޑްގެ ގުޅުން އޮއްވާ، ދެން ލިބިގެންދިޔަ ޚަބަރަކީ ފިލްމެއްގައި ޕާކިސްތާނުގެ މީހެއްގެ ރޯލު އަދާކުރުމަށް މަޝްހޫރު ބަތޮލް – އަމީތާބު އިންކާރު ކުރި ޚަބަރެވެ.
ރެސޫލް ޕޫކުއްޓީގެ ފުރަތަމަ ޑައިރެކްޝަންގައި ޕާކިސްތާނު މީހެއްގެ ރޯލު އަދާކުރުމަށް 2 އަހަރު ދުވަސް ވަންދެން ވިސްނުމަށްފަހު އެ ރޯލު އަދާނުކުރުމަށް އަމީތާބު ނިންމީ އިންޑިއާއާއި ޕާކިސްތާނުގެ ގުޅުން މިހާރު އޮތް ހާލަތަށް ބެލުމަށް ފަހުގައި ކަމަށް ޚަބަރު ލިބެއެވެ. މި ފިލްމުގައި އަމީތާބު އަދާކުރަންޖެހެނީ ޕާކިސްތާނާ އިންޑިއާއާއި ދެމެދު ސުލްހައިގެ ވާހަކަ ހިފައިގެން ހިނގާ މީހެއްގެ ރޯލެވެ. ނަމަވެސް އޭނާއަކީ ގައުމުދެކެ ރުޅިއަންނަ މީހެއްގެ ގޮތުގައި ސިފަވާން އަމީތާބު ބޭނުން ނުވާކަމަށް މީޑިއާ ރިޕޯޓްތައް ބުނެއެވެ.
ފިލްމެއްގައި ޕާކިސްތާނުގެ މީހެއްގެ ރޯލު އަދާނުކުރަން އަމީތާބު ނިންމުމާއެކު، ޕާކިސްތާނުގެ އެކްޓްރެސް މެހެވިޝް ހަޔާތުވަނީ އަމީތާބަށް ބަހުގެ ހަމަލާތަކެއް ދީފައެވެ. އެގޮތުން އަމީތާބު ފަދަ ބޮތަލަކު އެފަދަ ފިޔަވަޅެއް އަޅަން ގަސްތުކުރީތީ ހިތާމަކުރާކަމަށް މެހެވިޝްވަނީ ބުނެފައެވެ.
މިއާއެކު އުފެދޭ އެންމެ ބޮޑު ސުވާލަކީ އަމީތާބު "ލޮލީވުޑް"އަށް ޖެހިލުންވަނީތޯ ކުރެވޭ ސުވާލެވެ.
ޕާކިސްތާނުގެ ސިނަމާ ސިނާއަތަށް "ލޮލީވުޑް"ގެ ގޮތުގައި މުހާތަބު ކުރެވެނީ ޕާކިސްތާނުގެ ގިނަ ފިލްމުތަކެއްގެ މަސައްކަތް ކުރަމުން އަންނަ ލާހޯރްއަށް ނިސްބަތްކޮށެވެ.
