އާންމުކޮށް ސިނަމާތަކުގައި ރިލީޒްކުރުމަށް ބޮޑެތި ހުރަސްތަކެއް ގިރާކުރަން ޖެހުނު ފިލްމް "ޕީއެމް ނަރޭންދްރާ މޯދީ"އަށް އަންރިސްޓްރިކްޓަޑް (ޔޫ) ސެޓިފިކޭޝަން ދިނުމަށް އިންޑިއާގެ ސެންޓްރަލް ބޯޑް އޮފް ފިލްމް ސެޓިފިކޭޝަންއިން ނިންމައިފިއެވެ.
އިންޑިއާގެ ބޮޑުވަޒީރު ނަރޭންދްރާ މޯދީގެ ހަޔާތްޕުޅުގެ މައްޗަށް ބިނާކޮށް އުފައްދާފައިވާ ފިލްމް "ޕީއެމް ނަރޭންދްރާ މޯދީ"ގައި މޯދީގެ ރޯލު އަދާކޮށްފައިވާ ބަތޮލު ވިވެކް އޮބެރޯއީ ކުރި ޓުވީޓެއްގައި ވަނީ ސުޕްރީމް ކޯޓުގެ ނިންމުން ބަލައިގަންނަ ކަމަށާ، ޑިމޮކްރަސީ ނެގެހެއްޓުމަށްޓަކައި ޖުޑީޝަރީއިން ކުރި މަސައްކަތަކަށް ޝުކުރު އަދާކުރާކަމަށް ބުނެފައެވެ.
ފިލްމް "ޕީއެމް ނަރޭންދްރާ މޯދީ" ރިލީޒް ކުރުމަށް ހަމަޖެހިފައިވަނީ އޮތީ އޭޕްރިލް 5 ދުވަހު ކަމަށް ވީ ނަމަވެސް އެއީ އޭޕްރިލް 11 ގައި ފަށާ އިންޑިއާގެ އާންމު އިންތިހާބަށް ހިންގާ ޕްރޮޕަގަންޑާއެއް ކަމަށް ބުނެ، އެ ފިލްމު ރިލީޒް ކުރުމާ ދެކޮޅަށް އިންޑިއާގައި ވަނީ ސީރިއަސް މައްސަލަތަކެއް ފެންމަތިކޮށްފައެވެ.
ނަމަވެސް ސެންސަރު ބޯޑުގެ ނިންމުން މިއާ ހިލާފަށް ނެރެފައިވާއިރު، މިއީ އަބަދުވެސް ފިލްމުގެ ޓީމުން ދައްކަމުން އައި ވާހަކަ ކަމަށާ، ފިލްމް "ޕީއެމް ނަރޭންދްރާ މޯދީ" އަކީ އެއްވެސް ހާލެއްގައި ޕްރޮޕަގަންޑާއެއް ނޫންކަމަށް، ފިލްމުގެ ޑައިރެކްޓާ އޯމަންގް ކުމާރު ބީ ވަނީ ބުނެފައެވެ.
މަނާކުރެވިފައި ނުވާ ފިލްމުގެ ސެޓިފިކޭޝަން ލިބުމާއެކު، ފިލްމް "ޕީއެމް ނަރޭންދްރާ މޯދީ" ތިއޭޓަރުތަކުގައި މިހާރު އަޅުވާ ގޮތަށް ހަމަޖެހިފައި އޮތީ ވޯޓުލުން ފަށާ ދުވަސް ކަމުގައިވާ އޭޕްރިލް 11 ވަނަ ދުވަހުއެވެ.
