ބޮލީވުޑްގެ ޒުވާން އެކްޓާ ވަރުން ދާވަންގެ ލޯބިވެރިޔާ ނަތާޝާ ދަލާލް މަރާލާނެ ކަމުގެ އިންޒާރު، ވަރުންގެ "ފޭން"އެއް ދީފިއެވެ.
ސަޕޯޓަރުންނާ ފޭނުންނާ ގާތް ގުޅުމެއް ބާއްވަމުން އަންނަ ވަރުންގެ ލޯބިވެރިޔާ ނަތާޝާ މަރާލާނެ ކަމުގެ އިންޒާރު ދީފައިވަނީ، ވަރުންގެ ހަރަކާތްތަކަށް ފާރަލަމުންދިޔަ "ފޭން"އެއް ވަރުން ދިރިއުޅޭ ގެޔަށް ދިއުމަށް ފަހުގައެވެ.
ފިލްމް "ކަލާންކް" ޕްރޮމޯޓް ކުރުމުގެ މަސައްކަތުގައި ބުރަކޮށް އުޅެމުން އަންނަ ވަރުންއާ ބައްދަލުކުރުމަށް މަސައްކަތް ކުރަމުންދިޔަ "ފޭން" އެތައް ގަޑިއިރެއް ވަންދެން ވަރުންއަށް އިންތިޒާރު ކުރި ކަމަށްވެސް މީޑިއާ ރިޕޯޓްތައް ބުނެއެވެ. ކިތަންމެ އިރަކު އިންތިޒާރު ކުރި ނަމަވެސް އެދުވަހު ވަރުންއާ ބައްދަލު ކުރެވެން ނެތްކަމަށް ވަރުންގެ ސެކިއުރިޓީ އިން އެ "ފޭން"އަށް އެނގި ކަމަށާ، ނަމަވެސް އެ ސަރަހައްދު ދޫކޮށް ދިއުމަށް އޭނާ އިންކާރު ކުރި ކަމަށް މީޑިއާ ރިޕޯޓްތައް ބުނެއެވެ. އަދި "ހަމައިން ނެއްޓި"، "ނަތާޝާ މަރާލާނެ" ކަމަށް ތަކުރާރުކޮށް ބުނަމުން ދިޔަ ކަމަށްވެސް މީޑިއާ ރިޕޯޓްތައް ބުނެއެވެ. އަމިއްލަ ނަފުސަށްވެސް އަނިޔާ ކުރާނެ ކަމަށާ، ނަތާޝާއަށް އޭނާ ހަމަލާ ދޭނެ ގޮތްވެސް ކިޔަމުން ދިޔަ ކަމަށްވެއެވެ.
ވަރުންގެ ލޯބިވެރިޔާ ނަތާޝާ މަރާލާނެ ކަމުގެ އިންޒާރު ވަރުންއަށް ދިނީ އޭނާއަށް ސަޕޯޓްކުރާ އަންހެން "ފޭން"އެއް ކަމަށް މައުލޫމާތު ލިބެއެވެ.
ވަރުންގެ ސެކިއުރިޓީ އިން ވަނީ، ކަމާ ބެހޭ ފަރާތްތަކަށް މިމައްސަލަ ހުށަހަޅާފައެވެ.
