ޖުމްހޫރީ ޕާޓީން ވާދަކުރާ އެއްވެސް ކެންޑިޑޭޓަކަށް ކުރީގެ ރައީސް މައުމޫން އަބްދުލްގައްޔޫމް ތާއިދު ނުކުރައްވާ ކަމަށާއި، އެފަދަ ވާހަކަތައް ނުފެތުރުމަށް އެމްއާރުއެމުން ގޮވާލައިފިއެވެ.
އެމްއާރުއެމުން މިގޮތަށް ގޮވާލާފައިވަނީ، ލ. އަތޮޅަށް ވަޑައިގެން އުޅުއްވާ ޖޭޕީގެ ލީޑަރު ގާސިމް އިބްރާހީމް، އެ ޕާޓިގެ ކެންޑިޑޭޓެއްގެ ކެމްޕޭން ޖަލްސާގައި ދެއްކެވި ވާހަކައަކާއި ގުޅިގެންނެވެ. "ދަޕްރެސް" އަށް މައުލޫމާތު ދެއްވަމުން ރައީސް މައުމޫންގެ އެމްއާރުއެމްގެ ސެކްރެޓަރީ ޖެނެރަލް އަބްދުލްއަލީމް ވިދާޅުވީ، ޖޭޕީގެ އެއްވެސް ކެންޑިޑޭޓަކަށް ރައީސް މައުމޫން ތާއިދު ނުކުރައްވާ ކަމަށާއި، ގާސިމަށް މައުލޫމާތު ދިން މީހަކު އެ ދިނީ ދޮގު މައުލޫމާތެއް ކަމަށެވެ.
"އެމްއާރުއެމުން، ޖޭޕީގެ ކެންޑިޑޭޓަކަށް ތާއިދު ނުކުރޭ. ގާސިމަށް މައުލޫމާތު ދިން މީހަކު އެ ދިނީ ކަނޑައެޅިގެން ދޮގު މައުލޫމާތެއް" އަލީމް ވިދާޅުވިއެވެ.
ޖޭޕީގެ ފަރާތުން ގަމު ދާއިރާއަށް ވާދަކުރާ ޖޭޕީގެ ކެންޑިޑޭޓްގެ ކެމްޕޭން ޖަލްސާގައި ވާހަކަ ދައްކަވަމުން ގާސިމް ވިދާޅުވީ އޭނާއަށް ހަބަރު ލިބިވަޑައިގެންނެވި ގޮތުގައި މައުމޫން، ގަމު ދާއިރާގެ ޖޭޕީގެ ކެންޑިޑޭޓަށް ތާއިދުކުރައްވަން ނިންމެވީތީ މައުމޫނަށް އިހްލާސްތެރިކަމާއެކު ޝުކުރު ދަންނަވާ ކަމުގައެވެ.
އަލީމް ވިދާޅުވީ އެފަދަ ދޮގު މައުލޫމާތު ދޭ މީހަކު ދެމުން ގެންދާތީ އެކަން ހަރުކަށި އިބާރާތުން ކުށްވެރި ކުރައްވާ ކަމަށެވެ. އަދި ކެންޑިޑޭޓުންނާއި ގުޅިގެން ދޮގު މައުލޫމާތު ނުފެތުރުމަށާއި، އެކަމުގެ ސަބަބުން ކެންޑިޑޭޓުންނަށް ތާއިދު ގެއްލި ކެންޑިޑޭޓުންނަށް ގެއްލުން ލިބުމަކީ އެކަށީގެންވާ ކަމެއް ކަމަށް އަލީމް ވިދާޅުވިއެވެ.
