ކުރީގެ ރައީސް މުހައްމަދު ނަޝީދު ކެމްޕޭނުގައި ބުރަކޮށް އުޅުއްވަމުން ވެސް ވަގުތަށް ނަމާދަށް އަރުއްވާ ރައީސެއް ހަޔާތުގައި ވެސް ފެނިވަޑައިނުގަންނަވާ ކަމަށް ޓޫރިޒަމް މިނިސްޓަރު އަދި ޖުމްހޫރީ ޕާޓީގެ ރައީސް އަލީ ވަހީދު ވިދާޅުވެއްޖެއެވެ.
މިއަދު ޅ. ހިންނަވަރުގައި އޮތް އެމްޑީޕީގެ ކެމްޕޭން ޖަލްސާގައި ވާހަކަ ދައްކަވަމުން އަލީ ވަހީދު ވިދާޅުވީ، އެ ރަށުގައި ތިބި އެމްޑީޕީގެ މެންބަރުންނަށް ވުރެ ގިނައިން ނަމާދު ކުރާ ބަޔަކު ނޫޅޭނެ ކަމަށެވެ. ބައެއް ސިޔާސީ ލީޑަރުން ދީން ހަތިޔާރަކަށް ނަންގަވާކަން ފާހަގަކުރައްވަމުން އަލީ ވަހީދު ވިދާޅުވީ ދީން ހަތިޔާރަކަށް ނަގައިގެން ސިޔާސީ ލީޑަރުން ވާހަކަ ދައްކަވަން ނުޖެހޭ ކަމަށެވެ. އަދި އެއީ ސިޔާސީ މައިދާނުގައި ދައްކަވާނެ ވާހަކަ އެއް ނެތުމުން ދައްކަވާ ވާހަކަތަކެއް ކަމަށް ވެސް އަލީ ވަހީދު ވިދާޅުވިއެވެ.
އަލީ ވަހީދު މި މޭރުމުން ވާހަކަ ދައްކަވާފައި ވަނީ، އެޖެންޑާ 19 ގައި އޮތީ ބުދުފައްޅި އަޅާ ވާހަކަ ކަމަށް ވިދާޅުވެ، ޖުމްހޫރީ ޕާޓީގެ ލީޑަރު ގާސިމް އިބްރާހިމް ދައްކަވާފައިވާ ވާހަކަ އާ ގުޅިގެންނެވެ. އެގޮތުން އަލީ ވާހީދު ވިދާޅުވީ އެޖެންޑާ 19 ގައި އޮތީ ބުދުފައްޅިކަމަށް ގާސިމް ވިދާޅުވިއިރު އެޖެންޑާ 19 ގާސިމް ބައްލަވާނުލައްވާ ކަމަށެވެ.
ފަހަކަށް އައިސް އަލީ ވަހީދު ގެންދަވަނީ ފާޅުކަންބޮޑު ގޮތެއްގައި ޖޭޕީއަށް ފާޑުވިދާޅުވެ އެމްޑީޕީގެ ސިޔާސަތްތަކަށް ތައުރީފް ކުރައްވަމުންނެވެ. އަދި ޖޭޕީގެ ކެންޑިޑޭޓުގެ ކެމްޕޭންތަކަށް ވުރެ އަލީ ވަހީދު ބައިވެރިވެވަޑައިގަންނަވާ އެމްޑީޕީގެ ކެމްޕޭން ޖަލްސާތައް ފަހަކަށް އައިސް ގިނައެވެ. މީގެ ކުރިން ޖަލްސާއެއްގައި ވާހަކަދައްކަވަމުން އަލީ ވަހީދު ވަނީ ޖޭޕީން އަދި މިނިސްޓަރުކަމުގެ މަގާމުން ވަކިކުރެއްވި ނަމަވެސް މައްސަލައެއް ނެތްކަމަށް ވިދާޅުވެފައެވެ.
