ރައްޔިތުންގެ މަޖިލިސް އިންތިހާބު ލަސް ކުރުމަށް ދެއްކޭނެ ގާނޫނީ އެއް ވެސް ހުއްޖަތެއް ނޯންނާނެ ކަމަށް އިލެކްޝަންސް ކޮމިޝަން (އީސީ) ގެ ރައީސް އަހްމަދު ޝަރީފު ވިދާޅުވެއްޖެއެވެ.
އީސީން މިއަދު ބޭއްވި ނޫސްވެރިންގެ ބައްދަލު ވުމެއްގައި ވާހަކަ ދައްކަވަމުން ޝަރީފު ވިދާޅުވީ އިންތިހާބު ލަސް ކުރަން އުޅޭ ކަމުގެ އެއްވެސް އިޝާރާތެއް އީސީއަށް ލިބިފައި ނުވާ ކަމަށެވެ.
އަދި އިންތިހާބު ލަސް ކުރަން އެއްވެސް މުއައްސަސާ އަކުން ނުވަތަ ކޯޓަކުން ނިންމޭނީ ގާނޫނީ ހުއްޖަތެއްގެ އަލީގައި ކަމަށާއި، އެފަދަ ހުއްޖަތެއް ދެއްކޭނެ ފުރުސަތެއް، އީސީން މިފަހަރު ދީފައި ނޯންނާނެ ކަމަށް ޝަރީފު ވިދާޅުވިއެވެ.
ޝަރީފު މިހެން ވިދާޅު ވެފައި ވާއިރު، ޖުމްހޫރީ ޕާޓީ (ޖޭޕީ) އަދި އިދިކޮޅު ޕީޕީއެމް އިން، މަޖިލިސް އިންތިހާބު ލަސް ކުރުމަށްޓަކާ ހައިކޯޓަށް މައްސަލަ އެއް ވައްދަން އުޅޭ ކަމުގެ ހަބަރު ތައް ވަނީ ފެތުރިފައެވެ. އެ ދެ ޕާޓީއިން މި މައްސަލަ ކޯޓަށް ވައްދަން އުޅެނީ އިންތިހާބަށް ކެމްޕޭނު ނުލިބޭ ކަމަށް ބުނެ ކަމަށް ވެސް މައުލޫމާތު ލިބެއެވެ.
މި އަހަރު ގެ މަޖިލިސް އިންތިހާބުގައި ވޯޓުލާން ހަމަޖެހިފައި ވަނީ އޭޕްރީލް ހައެއް ވާ ހޮނިހިރު ދުވަހުގެ ހެނދުނު އަށަކުން ހަވީރު ހަތަރަކާ ހަމައަށެވެ. އިންޑިއާ އަދި ސްރީލަންކާގައި ބަހައްޓާފައިވާ ވޯޓު ފޮށި ތަކަށް ވޯޓުލުން ކުރިއަށް ދާނީ ހެނދުނު 8:30 އިން ހަވީރު 4:30 އަކާ ހަމައަށެވެ. އަދި މެލޭޝިއާ ގައި 11:00 ފެށިގެން ރޭގަނޑު 7:00 އާ ހަމައަށް ވޯޓު ލެވޭއިރު ޔޫކޭގައި ވޯޓު ލެވޭނީ 9:30 ން ފެށިގެން ހަވީރު 5:30 އާ ހަމައަށެވެ.
