މުނިފޫހިފިލުވުމުގެ ދާއިރާގައި ހަރަކާތްތެރިވާ ދެކުނު ކޮރެޔާގެ އެންމެ ވަރުގަދަ ކުންފުނިތަކުގެ ތެރޭގައި ގުނާލެވޭ ޖޭ.ވައި.ޕީ ކޮރެއާ އާއި މޯލްޑިވްސް މާކެޓިންގް އެންޑް ޕީއާރް ކޯޕަރޭޝަން (އެމް.އެމް.ޕީ.އާރް.ސީ) ގުޅިގެން ކުރިއަށް ގެންދާ ކޭ-ޕޮޕް ޝޯއެއްގެ ބައިވެރިން ހޮސްޓްކުރުމުގެ ފުރުސަތު ދިވެހި ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކަށް ހުޅުވާލައިފިއެވެ.
ޖޭ.ވައި.ޕީއަކީ ޖޭ.ވައި.ޕީ ޕިކްޗާޒްގެ ބެލެނިވެރި ކުންފުންޏަށްވާއިރު، މި ކުންފުނީގެ އުފެއްދުންތައް ބްރޯޑްކާސްޓްކުރުމަށް މައިގަނޑު ގޮތެއްގައި ބޭނުން ކުރަނީ ޔޫ-ޓިއުބް ޗެނަލެވެ. މިއީ ދުނިޔޭގައި މިހާރު ފަތުއަޑުކިއާފައި ގުގުމުން އަންނަ ކޭ-ޕޮޕް ޖޯންރޯގެ މިއުޒިކީ ދުނިޔެއަށް ތައާރަފުވެގެން އަންނަ ފުންނާބު އުސް ލަވަކިއުންތެރިންވެސް ބޭނުންކުރާ ޕްލެޓްފޯމެކެވެ.
ޖޭ.ވައި.ޕީގެ ކޭ-ޕޮޕް ޔޫޓިއުބް ޕްރޮގްރާމްތައް ރާއްޖޭގައި ނަގަން ނިންމާފައިވާއިރު، މި ޓީމުގައި ހިމެނޭ މެމްބަރުން ހޮސްޓްކުރުމުގެ ފުރުސަތު ދިވެހި ވިޔަފާރިވެރިންނަށް ހުޅުވާލާފައިވާއިރު، މިއީ ދިވެހިރާއްޖޭގެ މަންޒަރުތައް ބޭރު ދުނިޔޭގައި އިޝްތިހާރު ކުރުމަށް ލިބޭ ރަނުގެ ފުރުސަތެކެވެ.
ޖޭ.ވައި.ޕީގެ ޓީމުގައި ރާއްޖެ އަންނަ ބައެއް ކޭ-ޕޮޕް ސްޓާރުންނަށް ބަލާއިރު ކޮރީއަން ބޮއީ ބޭންޑް "ޓޫޕީ.އެމް"ގެ މެމްބަރު އަދި މަޝްހޫރު އެކްޓާ ހްވަން ޗެން-ސޮންގްއާއި މަޝްހޫރު ވެބްސީރީޒް "ޑްރީމް ނައިޓް"އާއި "ސަމް ގައި"އިން ގިނަ ބައެއްގެ ލޯބި ހޯދާފައިވާ މޮޑެލް އަދި އެކްޓާ ޗަންގް ހީ ރައިޔޮންގްގެ އިތުރުން، ކޮރެއަން ޑްރާމާ "ޓޫނާ އެންޑް ޑޮލްފިން" އިން މަޝްހޫރުވި ޖޮންގް ކުން ޖޫ ފާހަގަކޮށްލެވެއެވެ.
ފަތުރުވެރިކަމަށް ހާއްސަކޮށްގެން ތައްޔާރުކުރާ މި ޕްރޮގްރާމަކީ 10 މިނެޓުގެ ހަ އެޕިސޯޑުގެ މައްޗަށް އެކުލެވޭ ޕްރޮގްރާމް ސީރީޒްއެކެވެ. މި ޕްރޮގްރާމްގެ މަންޒަރުތައް ނެގުމަށް ޖޭ.ވައި.ޕީގެ ޓީމުން ރާއްޖޭގައި ހަރަކާތްތެރިވާނީ އޭޕްރިލް 15 އިން 19 ގެ ނިޔަލަށެވެ. މި ޓީމުން ރާއްޖޭގެ ރިސޯޓެއްގައި ތިން ރޭ ހޭދަކުރާއިރު މާލެއާއި ހުޅުމާލޭގައި ވެސް އެއް ރޭ ހޭދަކުރާނެއެވެ.
ބައިނަލްއަގުވާމީ ފެންވަރުގައި ގިނަ ބައެއްގެ ލޯތްބާއި ތަރުހީބު ހޯދާފައިވާ ދެކުނު ކޮރެޔާގެ ފަންނާނުން ހޮސްޓްކުރަން ބޭނުންވާ ފަރާތްތަކުން އެކަމަށް ޝައުގުވެރިކަން ފާޅުކޮށް، އޭޕްރިލް ހަތްވަނަ ދުވަހުގެ މެންދުރު 12:00 ގެ ކުރިން އެމް.އެމް.ޕީ.އާރް.ސީއަށް އަންގަންޖެހެއެވެ.
