ކުރީގެ ނައިބު ރައީސް އަހުމަދު އަދީބު، ނައިބް ރައީސް ކަމަށް އައްޔަން ކުރެއްވުމުގެ ކުރިން، ވަޒީރުންގެ މަޖިލީހުގެ ޓުއަރިޒަމް މިނިސްޓަރުކަމަށް އައްޔަން ކުރުމަށް ފާސްވީ ކެނދިކުޅުދޫ ދާއިރާގެ ކުރީގެ މެންބަރު އަހުމަދު އީސަގެ ވޯޓާއެކު ކަމަށް ވިދާޅުވެ ނަޝީދު ހެއްދެވީ އިތުރުފުޅެއްކަން ހާމަވެއްޖެއެވެ.

ނ. މާފަރުގައި އެމްޑީޕީން ބޭއްވި އީސަގެ ކެމްޕޭން ޖަލްސާގައި ވާހަކަފުޅު ދައްކަވަމުން ނަޝީދު ވިދާޅުވީ ރައީސް ޔާމީންގެ ވެރިކަމުގައި ޓުއަރިޒަމް މިނިސްޓަރު ކަމަށް އަދީބު އައްޔަން ކުރުމަށް މަޖިލީހުގައި ނެގި ވޯޓުގައި އެމްޑީޕީން ވޯޓު ނުލާނެ ކަމަށް ވިޕްލައިނެއް ނެރެފައި ވަނިކޮށް، އެފަހަރު އެމްޑީޕީގެ ކެނދިކުޅުދޫ ދާއިރާގެ މެންބަރު އަހުމަދު އީސާ ވޯޓު ދެއްވީ އެމަނިކުފާނުގެ އިރުޝާދުގެ މަތިން ކަމަށެވެ. އަދި އަދީބު ވަޒީރަކަށް އައްޔަން ކުރަން ފާސްވީ އީސަގެ ވޯޓާއެކުގައި ކަމަށެވެ.

"އީސަގެ އެއް ވޯޓާއެކު އަދީބު މަޖިލީހަށް ހޮވަން ފާސްވީ" ނަޝީދު ވިދާޅުވިއެވެ.

ނަމަވެސް އަދީބު ޓުއަރިޒަމް މިނިސްޓަރުކަމަށް އައްޔަން ކުރަން ނެގި ވޯޓުގައި އެދުވަހު މަޖިލީހަށް ހާޒިރުވެތިއްބެވި 73 މެންބަރުންގެ ތެރެއިން 45 މެންބަރުން އަދީބަށް ރުހުންދޭން ފެންނަކަމަށް ވޯޓު ދީފައިވެއެވެެ. މަޖިލީހުގައި އެއިރު އޮތީ ޕީޕީއެމްގެ މެޖޯރިޓީއެކެވެ. މި ވޯޓުގައި އަދީބަށް ރުހުންދޭން ނުފެންނަ ކަމަށް ވޯޓުދިނީ 28 މެންބަރުންނެވެ.

ވަޒީރުންގެ މަޖިލީހަށް އައްޔަން ކުރައްވާ ބޭފުޅުންގެ ރުހުން އޮތްތޯ ބެލުމަށް މަޖިލީހަށް ހުށަހެޅުމުން، މަޖިލިސް މެންބަރުންގެ މެދުގައި ވޯޓެއް ނަގައެވެ. ވަޒީރަކަށް ރުހުންދޭން ފާސްވަނީ މަޖިލީހަށް އެވަގުތު ހާޒިރުވެތިއްބެވި މެންބަރުންގެ ތެރެއިން ދެބައިކުޅަ އެއްބައި މީހުން ވޯޓު ދީގެންނެވެ. އެހެންކަމުން 73 މެންބަރުން އެދުވަހު މަޖިލީހަށް ހާޒިރުވެފައިވާ އިރު، އަދީބަށް ރުހުންދޭން ފާސްކުރުމަށް ބޭނުންވާނީ 37 މެންބަރުންގެ ވޯޓެވެ. އީސަގެ ވޯޓު ނުލާ ވެސް 44 މެންބަރުން އަދީބަށް ވޯޓު ދީފައިވެއެވެ.

އެހެންކަމުން އަދީބު ޓުއަރިޒަމް މިނިސްޓަރުކަމަށް އައްޔަން ކުރަން ފާސްކުރެވުނީ އީސަގެ ވޯޓުދީގެން ކަމަށް ބުނެ ނަޝީދު ހެއްދެވީ އިތުރުފުޅެއްކަން ހާމަވެއެވެ.

ކުޑަފަރީގައި ވާހަކަދައްކަވަމުން ނަޝީދު ވިދާޅުވީ އަދީބަށް ވޯޓު ދޭން އީސައަށް އިރުޝާދު ދެއްވީ ޔާމީންގެ ސަރުކާރުގައި ފަންޏެއް އަޅުވާ ސަރުކާރު ތެރޭގައި ރެނދުއެޅުވުމަށް ކަމަށެވެ. އަދި އެކަން އެގޮތަށްވި ކަމަށާއި، ޔާމީންގެ ސަރުކާރު ބަލި ކުރެވުނީ އެ ސަބަބަށްޓަކައި ކަމަށެވެ. އަދި އެ ދުވަހު އެގޮތަށް ކަންކުރެއްވުމުން އޭގެ ޝިކާރައަކަށްވީ 18 ވަނަ ރައްޔިތުންގެ މަޖިލީހަށް އީސަ ނުހޮވުން ކަމަށެވެ.

ސިޔާސީ