ޖަލުގައި ހުރުމަކީ ވޭން ހުރިކަމެއް ކަމަށް، ހެއްކަށް ނުފޫޒު ފޯރުވަފާނެކަމަށް ބުނެ، ދައުލަތުން އެދިގެން މައްސަލަ ނިމެންދެން ޖަލުގައި ބަންދު ކުރި ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ ކޮންގްރެސް ޕާޓީގެ ޓިކެޓުގައި ހުޅުމާލެ ދާއިރާއަށް ވާދަކުރައްވާ އިބްރާހިމް ފައިސަލް ކެމްޕޭނަށް ރޭ އެ އަވަށުގައި ބޭއްވި ޖަލްސާގައި ބައިވެރިވި މީހުންނާ ފޯނުން ވާހަކަފުޅު ދައްކަވަމުންނެވެ. ޔާމީން ވިދާޅުވީ އެ މަނިކުފާނު ޖަލަށްލީ އެ މަނިކުފާނުގެ އިސްތަށިފުޅުގައި އެއްވެސް ކުށެއް ނޭޅުވޭނެތީ ކަމަށެވެ. އަދި ޖަލަށްލީ އަނގަ ބަންދުކޮށް ސިޔާސީ މަސައްކަތް ހުއްޓުވުމަށް ކަމަށާއި، ޖަލުގައި އޮންނެވީ އެއްވެސް ހުކުމެއް އައިސްގެން ނޫންކަމަށް ވެސް ޔާމީން ވިދާޅުވިއެވެ.
ޔާމީންގެ ވެރިކަމުގައި އިދިކޮޅު ހުރިހާ ސިޔާސީ ލީޑަރުން ޖަލަށްލައި ބައެއް ފަނޑިޔާރުން ވެސް ޖަލަށް ލާފައިވެެއެވެ. ޔާމީން ވިދާޅުވީ އެމަނިކުފާނުގެ ސަރުކާރުގައި ސިޔާސީ ލީޑަރުންނާއި އެހެން މީހުން ޖަލަށް ވަދެފައި ހުރީ ބޮޑެތި ޖަރީމާތައް ހިންގައިގެން ކަމަށެވެ.
"އަޅުގަނޑުގެ މައްޗަށް ހުކުމެއް އައިސްގެން ނޫން ޖަލަށްލީ. އެއީ އަޅުގަނޑުގެ އަނގަ ބަންދުކުރަން. އަޅުގަނޑުގެ ފައިގައި ދަތި އަޅުވަން. މިރޭ ޖަލްސާއަށް ނުދެވުނީ އެހެން ކެންޑިޑޭޓުންގެ ޖަލްސާތަކަށް ވެސް ދާނެ ވަގުތު ނެތީމާ" ފޯނުން ވާހަކަފުޅު ދައްކަވަމުން ޔާމީން ވިދާޅުވިއެވެ.
ޔާމީން ވިދާޅުވީ އެމަނިކުފާނުގެ އެކައުންޓުތައް ފްރީޒް ނުކޮށް ހުރި ނަމަ، އިދިކޮޅު ކޯލިޝަނުން ގިނަ ގޮނޑިތައް ކާމިޔާބު ކުރައްވާނެ ކަމަށެވެ. މީގެ ކުރިން ވެސް ޔާމީން ވަނީ ކެމްޕޭން ފައިސާގައި އަތް ނުލެއްވިގެން އުޅުއްވާކަމަށް ވިދާޅުވެފައެވެ.
"އަޅުގަނޑަށް މިއުޅެނީ ޕާޓީގެ ކެންޑިޑޭޓުންނަށް ހޭދަކުރާނެ ލާރިކޮޅެއް ނުލިބިގެން. ލާރި ނެތިގެންނެއް ނޫން. ލާރި އެބަހުރި. އެކަމަކު ނުހުންނާނެ ސަރުކާރުގެ ބައި ލާރިއެއް ވެސް. އެތަނުގައި ނީންނާނެ ސަރުކާރުގެ ލޯ ލާރިއެއް ވެސް. ލާރި ހުރި ކަމަށްވާނަމަ، ސަރުކާރަށް ހުންނާނީ ނަގާފައި" ޔާމީން ވިދާޅުވިއެވެ.
ޔާމީންގެ މައްޗަށް ތުހުމަތު ކުރެވޭ މަނީ ލޯންޑަރިންގެ މައްސަލައިގައި، އެމަނިކުފާނު ހެއްކަށް ނުފޫޒު ފޯރުވަފާނެކަމަށް ބުނެ ދައުލަތުން އެދިގެން ޝަރީއަތް ނިމެންދެން ޖަލުގައި ބަންދުކުރުމަށް މިދިޔަ ފެބްރުއަރީ މަހުގެ 18 ވަނަ ދުވަހު ކްރިމިނަލް ކޯޓުން އަމުރުކުރިއެވެ. ނަމަވެސް އެ އަމުރު ބާތިލްކޮށް ހައިކޯޓުން އެމަނިކުފާނު މިނިވަންކުރީ މިދިޔަ ބުރާސްފަތި ދުވަހުއެވެ.
ޔާމީން ޖަލަށްލެވުނު ފަހުން އާލަސްކަންފުޅާ އައިޖީއެމްއެޗްގައި އެޑްމިޓްކޮށް ދެ ފަހަރަކަށް ފަރުވާ ދެއްވާފައިވެއެވެ. ޔާމީން ފަރުވާ ހޯއްދެވީ ހިތްޕުޅުގެ އާލާސްކަންފުޅަކާ އުޅުއްވާތީއެވެ.
ޔާމީންގެ އެކައުންޓަށް ބޮޑެތި އަދަދުތަކުން ފައިސާ ވަދެފައިވާ މައްސަލައިގައި، އެމަނިކުފާނުގެ މައްޗަށް ކުރާ މަނީ ލޯންޑަރިން މައްސަލައިގައި، އެކައުންޓްތައް ފްރީޒް ކުރުމަށް ވެސް ކްރިމިނަލް ކޯޓުން އަމުރެއް ނެރުނެވެ. ނަމަވެސް ހައި ކޯޓުން ވަނީ އެ އަމުރު ވެސް ބާތިިލްކޮށްފައެވެ.
