މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ވެހިކަލަކުން ދެ މިލިއަނެ ރުފިޔާ ފޭރިގަތް މައްސަލައިގައި 2 މީހަކު ހައްޔަރު ކޮށްފިއެވެ.
މި މައްސަލައިގެ ތުހުމަތުގައި، ކޯޓު އަމުރެއްގެ ދަށުން ހައްޔަރުކޮށްފައި ވަނީ 19 އަހަރުގެ ފިރިހެނަކާއި 23 އަހަރުގެ ފިރިހެނެކެވެ. ހައްޔަރު ކުރި ދެމީހުންގެ ތެރެއިން 19 އަހަރުގެ މީހާ ވަނީ އިއްޔެގެ ވަގުތެއްގައި ހައްޔަރު ކޮށް، ބަންދުގެ މުއްދަތަށް 15 ދުވަސް ދީފައެވެ. އަދި 23 އަހަރުގެ މީހާ ހައްޔަރުކޮށްފައި ވަނީ ރޭގެ ވަގުތެއްގައެވެ. އޭނާގެ ބަންދުގެ މުއްދަތަށް ދީފައިވަނީ ކިތަށް ދުވަސްކަމެއް އަދި ސާފުވާގޮތް ވަނީ ނުވެފައެވެ.
މިދިޔަ ބުދަ ދުވަހު ބޮޑުތަކުރުފާނު މަގުން ދުއްވާފައި ދަނިކޮށް މިފްކޯގެ ވޭނެއް ހުއްޓުވައި އޭގައި ހުރި ފައިސާ ފޭރި ގެންފައިވަނީ ހެލްމެޓުން މޫނު ނިވާކޮށްފައި ތިބި ބައެކެވެ. އެއީ ދެ ސައިކަލަގައި ދިޔަ ހަތަރު މީހެއް ކަމަށް ފުލުހުން މައުލޫމާތު ދީފައިވާ އިރު، އެ ހަތަރު މީހުންގެ ތެރެއިން މިހާތަނަށް ހައްޔަރު ކޮށްފައިވަނީ ދެ މީހުންނެވެ.
މި ފައިސާ ފޭރިގެންފައި ވަނީ ވޭނުގައި ތިބި މިފްކޯގެ މުވައްޒަފުންނަށް ބިރު ދެއްކުމަށް ފަހު ކޯރާޑިއަކުން ޖަހާ ވޭނުގެ ބިއްލޫރިގަނޑު ތަޅާލައެވެ. އެގޮތުން ވޭނުގެ ކުރީ ބިއްލޫރިގަނޑުގައި ރެނދުލާފައި ވާއިރު ޑްރައިވަރު ސީޓު ހުންނަ ފަޅީގެ ބިއްލޫރިގަނޑު ވަނީ އެއްކޮށް ފުނޑުފުނޑު ކޮށްލައިފައެވެ.
ފުލުހުން ދަނީ މައްސަލަ އިތުރަށް ތަހުގީގު ކުރަމުންނެވެ.
