ރާއްޖޭގައި މަސައްކަތްކުރުމަށް ގެންނަ ބިދޭސީންގެ ހުއްދައިގެ ކަންތައްތައް، ވޯކް ޕާމިޓްގެ ހިދުމަތް އިކޮނޮމިކް މިނިސްޓްރީގެ މިއަދު ދޭން ފަށައިފިއެވެ.
މީގެ ކުރިން ބިދޭސީ މަސައްކަތްތެރިން ހުއްދަ ދިނުމުގެ ކަންތައްތައް ކުރަމުން އައިސްފައި ވަނީ އިމިގްރޭޝަނުންނެވެ.
އިކޮނޮމިކް މިނިސްޓްރީގެ ބެލުމުގެ ދަށުން ދިނުމަށް ހަމަޖެހިފައިވާ ހިދުމަތްތަކުގެ ތެރޭގައި ރާއްޖެއަށް އެތެރެވާ ބިދޭސީންގެ ކަންކަން ބެލެހެއްޓުމަށް ބޭނުންކުރާ އެކްސްޕެޓް އޮންލައިން ސިސްޓަމްގައި ރަޖިސްޓްރީ ވުމުގެ ހިދުމަތާއި، ކޯޓާ ހަމަޖައްސައި ދިނުމުގެ ހިދުމަތާއި، އެމްޕްލޯއިމަންޓް އެޕްރޫވަލް ދިނުމުގެ ހިދުމަތާއި، ޑިޕޮސިޓް ފީ ބަލައިގަތުން އަދި ރީފަންޑްގެ ހިދުމަތް ދިނުން ހިމެނެއެވެ.
ވަޒީފާތަކަށް ގެންނަ ބިދޭސީންނަށް ހުއްދަ ދިނުމުގެ ހިދުމަތްތައް ދިނުމަށް ހަމަޖެހިފައި ވަނީ ކުރިންވެސް އެހިދުމަތްތައް ދެމުން ގެންދިޔަ ހުރަވީ ބިލްޑިންގެ ތިން ވަނަ ފަންގިފިލާގައި އިކޮނޮމިކް މިނިސްޓްރީއަށް ހާއްސަ ކުރެވިފައިވާ ކައުންޓަރުތަކުންނެވެ.
އިމިގްރޭޝަނުން ނަގާ އިކޮނޮމިކް މިނިސްޓްރީއަށް މި ހިދުމަތް ބަދަލު ކުރީ، ރިޔާސީ ވައުދުފުޅުގެ ދަށުންނެވެ.
ބިދޭސީން ރާއްޖެ ގެނައުމުގައި ބޮޑެތި ކޮރަޕްޝަން ހިމެނޭ ކަމުގެ އަޑުތައް އަބަދުވެސް ފެތުރެއެވެ. ރާއްޖޭގައި ގަވާއިދާ ހިލާފަށް ވަރަށް ގިނަ ބިދޭސީން އުޅޭ ކަމަށް ދިރާސާތަކުން ދައްކައެވެ.
