ރައްޔިތުންގެ މަޖިލީހުގެ އިންތިހާބުގައި ހިތަދޫ މެދު ދާއިރާއަށް އަމިއްލަ ގޮތުން ވާދަކުރި ޒާހިދު ރަމީޒާއި، ލޭބާ ޕާޓީގެ ފަރާތުން، ގެމަނަފުށީ ދާއިރާ އަށް ވާދަ ކުރި މުހައްމަދު އިލްހާމުގެ ނަން އަނބުރާ ގެން ގޮސްފިއެވެ.
ގެމަނަފުށީ ދާއިރާއަށް ވާދަ ނުކުރަން ނިންމި އިލްހާމު ވަނީ، އެ ދާއިރާ އަށް ވާދަ ކުރާ ޖުމްހޫރީ ޕާޓީގެ ކެންޑިޑޭޓް އަލީ އާދިލަށް ތާއީދު ކުރަން ނިންމާފައެވެ. އެކަމަކު ނަން އަނބުރާ ގެންދިޔަ ޒާހިދު، އެހެން ކެންޑިޑޭޓަކަށް ތާއީދު ކުރަން ނިންމި ކަމެއް އިއުލާނެއް ނުކުރެއެވެ.
ގެމަނަފުށީ ދާއިރާއަށް، އާދިލް ގެ އިތުރުން ވާދަ ކުރައްވަނީ، އެ ދާއިރާގެ މެންބަރު ޖަމީލް އުސްމާނާއި، އެމްޑީޕީ ގެ ކެންޑިޑޭޓް، އަހްމަދު ސައީދެވެ. ހިތަދޫ މެދު ދާއިރާއަށް މިހާރު ވާދަ ކުރަނީ، އެމްޑީޕީގެ ކެންޑިޑޭޓް އަހުމަދު ރަޝީދާއި، ޖުމްހޫރީ ޕާޓީގެ ކެންޑިޑޭޓް ހުސެން ސޯލިހާއި، އަމިއްލަ ކެންޑިޑޭޓް މުހައްމަދު އާރިފެވެ.
މަހިބަދޫ ދާއިރާއަށް ވާދަކުރި އެމްޑީޕީގެ ކެންޑިޑޭޓު އަލީ އަހުމަދު ވެސް މިހާރު ވަނީ މަޖިލިސް އިންތިހާބުގައި ވާދަ ނުކުރަން ނިންމާ، ނަން އަނބުރާ ގެންގޮސްފައެވެ.
