ރައްޔިތުންގެ މަޖިލީހުން ނިންމަންޖެހޭ މުހިންމު މަސައްކަތްތައް ނުކޮށް މަޖިލީހުގެ ގަވައިދަށް އިސްލާހު ގެންނަމުންދާތީ އެކަމާ ކަންބޮޑުވެލައްވާ ކަމަށް، އެމްޑީޕީ ޕާލިމަންޓަރީ ގުރޫޕުގެ ލީޑަރު މުހައްމަދު އަސްލަމު ވިދާޅުވެއްޖެއެވެ.
މިއަދު ރައްޔިތުންގެ މަޖިލީހުގެ އިދާރާ ކުރިމަތީ އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި، ވާހަކަ ދައްކަވަމުން އަސްލަމް ވިދާޅުވީ، ކޮމިޝަންތަކަށް ބާރު ދިނުމުގެ ބިލާއި، ގާނޫނީ ހިދުމަތުގެ ބިލުގެ މަސައްކަތް މަޖިލީހުގައި މިހާރު ވެސް އެބަ އޮތްކަމަށެވެ. އެހެން ނަމަވެސް އެ މަސައްކަތްތަށް ނުނިންމާ މަޖިލީހުގައި ތާށި ކޮށްފައި ވާކަމަށް އޭނާ ވިދާޅުވިއެވެ.
އަސްލަމް ވިދާޅުވީ ދައުލަތުގެ މައިގަނޑު ސިޔާސަތުތައް ކަނޑައެޅުމުގެ ބާރު ރައީސުލްޖުމްހޫރިއްޔާ އަށް ގާނޫނު އަސާސީން ދީފައި ވާކަމަށެވެ. އަދި ސަރުކާރެއްގެ އެންމެ މުހިންމު އެއް މަގުސަދަކީ ހަރުދަނާ ސިޔާސަތެއް ގާއިމު ކުރުން ކަމަށާއި، ސަރުކާރުގެ ސިޔާސަތު ތަކަ ފުށު އަރާނެހެން މަޖިލީހުން ކަންތައްތައް ބަދަލު ކުރެވޭ ގޮތަށް އޮންނަ އޮތުމަކީ، ކަންބޮޑުވާ ކަމުގައެވެ.
އެގޮތުން ވަޒީރުންގެ އިތުބާރު ނެތްކަމުގެ މައްސަލަ އާ ގުޅޭގޮތުން ގަވައިދަށް ގެންނަން އުޅޭ ބަދަލާއި، މަޖިލީހުގެ ގަވައިދުގެ 71 ވަނަ މާއްދާއަށް ގެނެސް ފައިވާ ބަދަލު ފާހަގަ ކޮށްލެވޭ ކަމަށް އަސްލަމް ވިދާޅުވިއެވެ. އަސްލަމް ވިދާޅުވީ، އެ ބަދަލުތައް ގެންނަނީ ސަރުކާރަށް ޖެއްސުން ކޮށް ފިއްތުން ތައް ކުރިމަތި ކުރުމުގެ ގޮތުން ކަމަށެވެ.
މީގެ އިތުރުން އަސްލަމް ވިދާޅުވީ، ރައީސް ނަޝީދުގެ ވެރިކަން ވައްޓާލުމަށްޓަކާ ވެސް އެންމެ ފުރަތަމަ ކުރަން ފެށި ކަމަކީ ވަޒީރުންގެ އިތުބާރު ނެތް ކަމުގެ މައްސަލަ ތައް މަޖިލީހުން ކުރިއަށް ގެންދިޔުން ކަމަށެވެ. އަދި ސަރުކާރަށް ދަތި ކުރުމުގެ ގޮތުން މާލިއްޔަތު ގާނޫނަށް ބަދަލުތައް ގެންނަން ފެށިކަމަށާ، ބައެއް ގާނޫނު ތަކުގެ ތަކުގެ ތެރެއިން، ދައުލަތަށް ނުކަތާ ވަރަށް ހަރަދުތައް ބޮޑުކުރި ކަމަށް ވެސް އޭނާ ވިދާޅު ވިއެވެ.
