ވަޒީރެއް ނުވަތަ މިނިވަން މުއައްސަސާ އެއް ގެ ބޭފުޅެއް ގެ މައްޗަށް އިތުބާރު ނެތް ކަމަށް ހުށަހަޅައި، މަޖިލީހުގެ އަޣުލަބިއްޔަތުން ފާސްވެއްޖެ ނަމަ އެ މީހަކު ވަގުތުން މަގާމުން ވަކިވާ ގޮތަށް، މަޖިލީހުގެ އާންމު ކޮމެޓީން، ގަވައިދަށް ގެނައި އިސްލާހަށް ސުޕްރީމް ކޯޓުގެ ލަފައަކަށް އެދުމަށް ނިންމައިފިއެވެ.
ކުރިން މަޖިލީހުން ނިންމާފައި އޮތީ، މިއަދު މަޖިލީހުގެ ތަޅުމުގައި އެ އިސްލާހަށް ވޯޓަށް އެހުމަށެވެ.
އެކަމަކު މިހާރު، ސުޕްރީމް ކޯޓުގެ ލަފައަކަށް އެދުމަށް، ނިންމާފައިވަނީ ޕާލިމެންޓަރީ ގުރޫޕުގެ ލީޑަރުންނާ މަޝްވަރާ ކުރެއްވުމަށް ފަހުގައި އެ ބޭފުޅުންގެ މަޝްވަރާގެ މަތިން ކަމަށް، ރައްޔިތުންގެ މަޖިލީހުގެ ރައީސް ގާސިމް އިބްރާހީމް މިއަދު ވިދާޅުވިއެވެ.
ގާސިމް ވިދާޅުވީ ސުޕްރީމް ކޯޓުގެ ލަފައަކަށް އެދެން ނިންމާފައިވަނީ، އިތުބާރު ނެތްކަމުގެ މައްސަލައާ ގުޅިގެން، މީގެ ކުރިން ސުޕްރީމް ކޯޓުން، ކޮށްފައިވާ ހުކުމާއި ގުޅުވައިގެން، އެ ކޯޓަށް، ގަވައިދު އިސްލާހުކުރެވޭނެ ނުވަތަ މުރާޖައާ ކުރެވޭނެ ފުރުސަތު އޮތްތޯ ބެލުމަށް ކަމުގައެވެ.
އިތުބާރު ނެތްކަމުގެ މައްސަލައާ ގުޅޭ ގޮތުން 2017 ވަނަ އަހަރު ސުޕްރީމް ކޯޓުން ކުރި ހުކުމުގައި ބުނެފައި ވަނީ ރައްޔިތުންގެ މަޖިލީހުން ނަގާ އިތުބާރު ނެތްކަމުގެ ވޯޓަކީ އެކަށީގެންވާ ސަބަބެއް އޮވެގެން ނަގާ ވޯޓަކަށް ވާންޖެހޭނެ ކަމަށެވެ. އަދި އިތުބާރު ނެތް ކަމަށް މަޖިލީހުން ފާސްކުރި ކަމުގައި ވިޔަސް އެ މައްސަލައާ ގުޅޭ ގޮތުން ފަހުގެ ނިންމުން ނިންމާނީ އެ ކޯޓުން ކަމަށް ވެސް ހުކުމުގައި ވެއެވެ.
މަޖިލީހުގެ އާންމު ކޮމެޓީއިން، ނިންމާފައި ވަނީ، އިތުބާރު ނެތްކަމުގެ މައްސަލަ ކޮމިޓީއަކަށް ފޮނުވާތާ 10 ދުވަސް ތެރޭގައި އެ މައްސަލައެއް ނިންމައި، ބަހުސްގެ މަރުހަލާއަށް މަޖިލީހުގެ ތަޅުމަށް ފޮނުވަން ޖެހޭ ކަމަށެވެ. އަދި މަޖިލީހުގެ އަޣުލަބިއްޔަތުން ފާސްވެއްޖެ ނަމަ އެ މީހަކު ވަގުތުން މަގާމުން ވަކިވާނެ ކަމަށް ވެސް އިސްލާހުގައި ވެއެވެ.
