ސާފް ރޮކް މިއުޒިކްގެ ރަސްގެފާނުގެ ގޮތުގައި މަޝްހޫރުވެފައިވާ ކުޅަދާނަ ރޮކް ގިޓަރިސްޓް ޑިކް ޑޭލް މަރުވެއްޖެއެވެ.
ކުއެންޓިން ޓެރެންޓީނޯގެ ތްރިލާ ޑްރާމާ "ޕަލްޕް ފިކްޝަން" ފަށަން ބޭނުންކުރި "މިސާލޫ"އިން ގިނަ ބައެއްގެ މެދުގައި ބޮޑު މަގުބޫލުކަމެއް ހޯދި ޑިކް ޑޭލް މަރުވި ސަބަބެއް އަދި ކަށަވަރު ކުރެވިފައެއް ނުވެއެވެ.
ސާފް ކޮމިއުނިޓީގެ މެދުގައި ބޮޑު މަގުބޫލުކަމެއް ހޯދާފައިވާ ސާފް ރޮކް އަކީ ރޮކް ޖޯންރޯގެ ބައެކެވެ. 1960 ގެ އަހަރުތަކުގައި މި ޖޯންރޯއަށް ޑިކް ޑޭލް އުފައްދަމުންދިޔަ މިއުޒިކުތަކުގެ ނަތީޖާއެއްގެ ގޮތުން ގިނަ ފަންނާނުންނެއް އެ ޖޯންރޯގެ ރާގުތައް ކުޅުމަށް ޝައުގުވެރިކުރުވިއެވެ.
އުމުރުން 81 އަހަރުގައި ޑިކް ޑޭލް މިދުނިޔެއާއި ވަކިވެ ދިޔަކަން މީޑިއާއަށް ހާމަކުރުމާއިއެކު މުނިފޫހިފިލުވުމުގެ ދާއިރާގައި މަސައްކަތްކުރާ ގިނަ ބަޔަކު ދަނީ އެކަމާ ހިތާމަ ފާޅުކޮށް، ސޯޝަލް މީޑިއާގައި ޝުއޫރުތައް ފާޅުކުރަމުންނެވެ.
