އަދާލަތު ޕާޓީން އެމްޑީޕީއާއެކު މަސައްކަތް ކުރާހާ ހިނދަކު ރައީސް އިބްރާހީމް މުހައްމަދު ސޯލިހުގެ ވެރިކަން ވައްޓާލުމަކީ ކުރެވޭނެ ކަމެއް ނޫންކަމަށް އަދާލަތު ޕާޓީގެ ރައީސް ޝައިހް އިމްރާން އަބްދުﷲ ވިދާޅުވެއްޖެއެވެ.
ކޯލިޝަން ސަރުކާރުގެ ހަތަރު ލީޑަރުންގެ ތެރޭގައި ހިމެނިވަޑައިގަންނަވާ އަދި ހޯމް މިނިސްޓަރުކަން ވެސް ކުރައްވަމުން ގެންދަވާ އިމްރާން މިހެން ވިދާޅުވީ އެ ޕާޓީގެ ޓިކެޓްގައި ފަރެސް މާތޮޑާ ދާއިރާއަށް ވާދަކުރާ ކެންޑިޑޭޓުގެ ކެމްޕޭން ޖަލްސާގައެވެ. އިމްރާން މިކަން ހާމަކުރައްވާފައި ވަނީ އެމްޑީޕީން އެ ޕާޓީގެ ބައެއް ކެންޑިޑޭޓުންނަށް ތާއިދު ކުރަން ނިންމާ އެކަން ރަސްމީކޮށް ރޭ އިއުލާން ވެސް ކޮށްފައި ވަނިކޮށެވެ. އަދާލަތާއި އެމްޑީޕީން ގުޅިގެން މަޖިލިސް އިންތިހާބުގައި ވާދަކުރުމަށް ވަނީ ނިންމާފައެވެ.
އިމްރާން ވިދާޅުވީ އެމްޑީޕީއާއި ގުޅިގެން މަޖިލިސް އިންތިހާބުގައި ވާދަކުރަން ނިންމާފައި ވަނީ ރައްޔިތުންނަށް ދިމާވެދާނެ ނިކަމެތި ކަމަކުން ސަލާމަތް ކުރުމަށާއި، ރައްޔިތުންނަށް ހައްގު މިންވަރު ހޯއްދަވައި ދެއްވުމުގެ ބޭނުގައި ކަމަށެވެ. އަދި މަޖިލިސް އިންތިހާބު ކާމިޔާބު ކުރުމަށް ގުޅިގެން މަސައްކަތް ކުރައްވަން ޖެހިވަޑައިގަންނަވާ ކަމަށާއި ކުރިއަށް އޮތް ދުވަސްތަކުގައި އަރައިގަނެވެން އޮތީ މަޖިލިސް އިންތިހާބު ކާމިޔާބުކޮށްގެން ކަމަށް އިމްރާން ވިދާޅުވިއެވެ.
"ރައްޔިތުންނަށް ކުރިމަތިވެދާނެ ނިކަމެތިކަމަކުން ރައްޔިތުން ސަލާމަތް ކުރަން ޖެހޭ، ރައްޔިތުންނަށް ހައްގުވާ މިންވަރު ރައްޔިތުންނަށް ހޯދައި ދޭން ޖެހޭ، މި ސަބަބަކީ އަޅުގަނޑުމެން އެކުގައި މަސައްކަތް ކުރަން ޖެހޭ ސަބަބު" އިމްރާން ވިދާޅުވިއެވެ.
އިމްރާން ވިދާޅުވީ ރައީސް ސޯލިހުގެ މެނިފެސްޓޯ ތަންފީޒު ކުރެވެން އޮތީ އަދާލަތު ޕާޓީއާ އެމްޑީޕީ ގުޅިގެން މަސައްކަތްކޮށްގެން ކަމަށެވެ. އަދި އަދާލަތަށް ވެސް އެކަށީގެންވާ މިންވަރަށް މަޖިލިސް ތަމްސީލު ކުރަން ފުރުސަތު ލިބިފައިވާ ކަމަށާއި، 2015 ވަނަ އަހަރުގެ ހާލަތަށް ދިޔަ ނުދިނުމަށް ގިނަ މަސައްކަތްތަކެއް ކުރަން ޖެހޭ ކަމަށް އިމްރާން ވިދާޅުވިއެވެ.
މަޖިލިސް އިންތިހާބަށް ދެ ޕާޓީން ވެފައިވާ އެއްބަސްވުމުގެ ދަށުން އަދާލަތުން ވަނީ އެމްޑީޕީން ކުރިމަތިލާ ހަތަރު ދާއިރާއަކަށް ތާއިދުކުރުމަށް ނިންމާފައެވެ. އަދި އެމްޑީޕީން ވަނީ އަދާލަތު ޕާޓީން ވާދަކުރާ ދެ ދާއިރާއަކަށް ތާއިދުކުރަން ނިންމާފައެވެ.
ހާދަހާ ވަރެކޭވަނީ ވެރިކަން ވެއްޓިދާނެތީ. މަށަށް ހަމަ ހީވަނީ މިހެންދާންވެއްޖެއާ އަމިއްލައަށް ވެއްޓޭނީހެން. ވެރިކަން ދިފާއު ކުރަން ހަދައިގެން މުޅި ފޯކަސް ތިޔޮތީ ގެއްލިފައި. ދެން ކޮން ތަރައްގީއެއް އަދި ވައުދެއް ފުއްދާދެވޭނީ؟ މަޖިލިސް މެޖޯރިޓީ ލިބިގެންވެސް ވެރިކަން ދެމެހެއްޓޭނީ ގާބިލު މީހުންނަށް. މެޖޯރިޓީ ލިބޭއިރަށް ޕާޓީ ބަދަލު ނުކުރެވޭ އިސްލާހުވެސް ލާނެކަން އިނގޭ އެންމެންނަށްވެސް. އޭތި ފާސްކޮށްގެން މެޖޯރިޓީ އޮންނާނީ ނަމެއްގައި.