ވަޒީރެއް ނުވަތަ މިނިވަން މުއައްސަސާ އެއް ގެ ބޭފުޅެއް ގެ މައްޗަށް އިތުބާރު ނެތް ކަމަށް ހުށަހަޅައި، މަޖިލީހުގެ އަޣުލަބިއްޔަތުން ފާސްވެއްޖެ ނަމަ އެ މީހަކު ވަގުތުން މަގާމުން ވަކިވާ ގޮތަށް، މަޖިލީހުގެ އާންމު ކޮމެޓީން، ގަވައިދަށް ގެނައި އިސްލާހަށް ވޯޓަށް އެހުން މާދަމާ އަށް އެ ޖެންޑާ ކޮށްފިއެވެ.
މަޖިލީހުގެ އާންމު ކޮމެޓީއިން، ނިންމާފައި ވަނީ، އިތުބާރު ނެތްކަމުގެ މައްސަލަ ކޮމިޓީއަކަށް ފޮނުވާތާ 10 ދުވަސް ތެރޭގައި އެ މައްސަލައެއް ނިންމައި، ބަހުސްގެ މަރުހަލާއަށް މަޖިލީހުގެ ތަޅުމަށް ފޮނުވަން ޖެހޭ ކަމަށެވެ. އަދި މަޖިލީހުގެ ތަޅުމުގައި އެ ވަޒީރަކަށް ނުވަތަ އޭނާގެ ވަކީލަކަށް ޖަވާބުދާރީވާނޭ ފުރުސަތު ދޭން ޖެހޭނެ ކަމަށެވެ.
ގަވައިދަށް އިސްލާހު ހުށައެޅުއްވި، ކެލާ ދާއިރާގެ މެންބަރު، އަލީ އާރިފް ވިދާޅުވީ، އިސްލާހު ހުށައަޅުއްވާފައި ވަނީ 2017 ވަނަ އަހަރު ސުޕްރީމް ކޯޓުން ކުރި ހުކުމުގައިވާ ގައިޑް ލައިނާ އެއް ގޮތަށް ކަމަށެވެ.
އިތުބާރު ނެތްކަމުގެ މައްސަލައާ ގުޅޭ ގޮތުން 2017 ވަނަ އަހަރު ސުޕްރީމް ކޯޓުން ކުރި ހުކުމުގައި ބުނެފައި ވަނީ ރައްޔިތުންގެ މަޖިލީހުން ނަގާ އިތުބާރު ނެތްކަމުގެ ވޯޓަކީ އެކަށީގެންވާ ސަބަބެއް އޮވެގެން ނަގާ ވޯޓަކަށް ވާންޖެހޭނެ ކަމަށެވެ. އަދި އިތުބާރު ނެތް ކަމަށް މަޖިލީހުން ފާސްކުރި ކަމުގައި ވިޔަސް އެ މައްސަލައާ ގުޅޭ ގޮތުން ފަހުގެ ނިންމުން ނިންމާނީ އެ ކޯޓުން ކަމަށް ވެސް ހުކުމުގައި ވެއެވެ.
އިތުބާރު ނެތްކަމުގެ މައްސަލަ ތަކާ ގުޅޭ ގޮތުން ގަވައިދަށް އިސްލާހު ގެންނަން ނިންމަފައި މިވަނީ، ޑިފެންސް މިނިސްޓަރު މާރިޔާ އަހުމަދު ދީދީ ގެ، އިތުބާރު ނެތް ކަމުގެ މައްސަލައެއް މަޖިލީހަށް ހުށައެޅުމުން، އެ މައްސަލަ ކުރިއަށް ގެންދެވޭނީ، ގަވައިދަށް އިސްލާހު ގެނައުމަށް ފަހުގައި ކަމަށް، މަޖިލީހުގެ ރިޔާސަތުން ނިންމާފައި ވަނިކޮށެވެ.
