އިންޑިއާއާއި ޕާކިސްތާނާއި ދެމެދު އުފެދިފައިވާ ހަމަނުޖެހުންތަކުގައި އިންޑިއާގެ ފިލްމީ ސިނާއަތް ކަމުގައިވާ ބޮލީވުޑްގެ އުފެއްދުންތައް ޕާކިސްތާނުގައި އެއްވެސް ގޮތަކަށް ބޭނުން ކުރުން މަނާކުރުމާއެކު ޕާކިސްތާނުގެ ފަންނުވެރިން އެކަމާ ކަންބޮޑުވުން ފާޅުކުރަން ފަށައިފިއެވެ.
ޕާކިސްތާނުގެ ސިނަމާތަކުގައި ބޮލީވުޑް ފިލްމުތައް ދެއްކުން މަނާކޮށް، ޕާކިސްތާނުގެ ޓީވީ ޗެނަލްތަކުން އިންޑިއާގެ ޓީވީ އުފެއްދުންތައް ދެއްކުން މަނާކުރި ކުރުމަކީ ޕާކިސްތާނުގެ އާންމު ރައްޔިތުންގެ ހިތްތަކުގައި ވަތަނީ ލޯބި އިތުރުކުރުވި ކަމަށްވީ ނަމަވެސް، ޕާކިސްތާނުގެ ފަންނުވެރިންގެ ފިކުރު ތަފާތެވެ.
ޕާކިސްތާނުގެ ފިލްމީ ދާއިރާގައި މަސައްކަތްކުރާ ގިނަ މީހުންނަކީ ބޮލީވުޑް ސިނާއަތުން ހިތްވަރަރު ލިބިގެން، ބޮލީވުޑް އަސްލަކަށް ބަލައިގެން އެ ރޮނގުން ކުރިއަރަމުން އަންނަ ފަންނުވެރިންނަށްވީއިރު، ޕާކިސްތާނުގައި ބޮލީވުޑް އުފެއްދުންތައް މަނާކުރުމަކީ ޕާކިސްތާނުގެ ފިލްމީ ސިނާއަތް ކުރިއަރާ ދިއުމަށް އެޅޭ ހުރަހެއް ކަމަށް ޕާކިސްތާނުގެ ފަންނުވެރިން ގަބޫލުކުރެއެވެ.
ޕާކިސްތާނުގައި ފިލްމު ދެއްކުމަށް ހާއްސަކޮށްގެން 100އަށްވުރެ ގިނަ ސިނަމާ ހިންގަމުންދާއިރު، ކޮންމެ ފިލްމެއްވެސް ސިނަމާއެއްގައި ހިނގަނީ ދެ ހަފުތާއެއްހާ ދުވަހުގެ މުއްދަތަށެވެ. އެހެންކަމުން، ބޮލީވުޑްގެ އުފެއްދުންތަކާއި ނުލާ ސިނަމާގެ ވިޔަފާރީ ހިންގަން ބޭނުންކަމަށްވަނީނަމަ ހަފުތާއަކު 26 އާ ފިލްމު އަޅުވަންޖެހޭނެކަމަށް ދާއިރާގެ ތަޖުރިބާކާރުން ދަނީ ބުނަމުންނެވެ.
ޕާކިސްތާނުގެ ފިލްމީދާއިރާގެ ޚަބަރުތައް ބުނާ ގޮތުގައި އެގައުމުގެ ފިލްމީ ސިނާއަތަށް އާމްދަނީގެ ގޮތުގައި ލިބޭ ފައިސާގެ %70 ހިއްސާކުރަނީ އިންޑިއާގެ އުފެއްދުންތަކެވެ.
ކަންމިހެންއޮތްއިރު، އިންޑިއާގެ ފިލްމީ ސިނާއަތުން ވަނީ ޕާކިސްތާނުގެ ފަންނުވެރިންނާއި ދެކޮޅަށް އަމުރެއް ނެރެފައެވެ. އެގޮތުން ޕާކިސްތާނަށް އުފަން ފަންނުވެރިންނަށް، އިންޑިއާގެ ފިލްމީ ސިނާއަތުގައި އެއްވެސް މަސައްކަތެއް ނުކުރެވޭ ގޮތަށް މިވަގުތު އޮތީ ހަމަޖައްސާފައެވެ.
