އެމެރިކާގައި ކުރިއަށް ގެންދިޔަ ކޮލެޖް އިމްތިހާނުގައި މަކަރާއި ހީލަތް ހެދުމުގެ ކުށުގެ ދައުވާ އަމާޒުވާ 40 އަށްވުރެ ގިނަ މީހުންގެ ތެރޭގައި މަޝްހޫރު ސެލެބްރިޓީންތަކެއްވެސް ހިމެނޭ ކަމަށް ޚަބަރު ލިބިއްޖެއެވެ.
ދައުވާ ލިބޭ ސެލެބްރިޓީންގެ ތެރޭގައި ޓީވީ ޑްރާމާ "ޑެސްޕަރޭޓް ހައުސްވައިވްސް"ގެ ތަރި ފެލީސިޓީ ހަފްމަންވެސް ހިމެނެއެވެ.
ކޮލެޖް އިމްތިހާނަށް މަކަރާއި ހީލަތް ހެދި ކަމަށް ބުނާ މައްސަލައަކީ، ކޮލެޖުތަކުން ލާޒިމުކުރާ އެންޓްރަންސް އިމްތިހާނުގައި މަކަރު ހެދުމުގެ އިތުރުން، ކުޅިވަރުތަކުގައި ޝާމިލުވެ ނޫޅޭ ކުދިންވެސް ފޭކު އެތްލެޓިކްސް ސްކޮލާޝިޕްތަކެއްގައި ކޮލެޖަށް ވައްދަން މަސައްކަތް ކުރި ކަމަށް ބުނާ މައްސަލައެކެވެ.
މި އިމްތިހާނުތަކަކީ މަޝްހޫރު ސްކޫލްތައް ކަމަށްވާ ޔޭލްއާއި ސްޓޭންފޯޑްގެ އިތުރުން ޖޯޖްޓައުން ޔުނިވާސިޓީފަދަ ތަންތަނަށް ވަނުމުގެ ފުރުސަތާއި ގުޅިފައިވާ އިމްތިހާނުތަކެކެވެ.
މި އޮޅުވާލުންގަނޑުގައި ފެލީސިޓީ ބައިވެރިވެފައިވަނީ އޭނާގެ ދަރިފުޅުގެ ނަމުގައި އިމްތިހާނު ހެދުމަށް 15000 ޑޮލަރު ޚަރަދުކޮށްގެން ކަމަށް މައުލޫމާތު ލިބެއެވެ. ފެލީސިޓީ ޝަރިޔަތަށް ހާޒިރުކުރި ނަމަވެސް، 250000 ޑޮލަރުގެ ކަފާލާތެއްގެ ދަށުން އޭނާ މިވަގުތު ހުރީ މިނިވަންކޮށްފައެވެ.
