ދަރިންނަށް ހަރަދު ނުދިން މައްސަލާގައި ޖަލަށްލާފައިހުރި އާރް ކެލީ މިނިވަންކޮށްފިއެވެ.
އާރް ކެލީ މިނިވަންކޮށްފައިވަނީ ހަރަދުގެ ގޮތުގައި އޭނާ ދައްކަން އޮތް 161،000 ޑޮލަރު، ދައްކާ ހަލާސް ކުރުމުންނެވެ. ނަމަވެސް އާރް ކެލީގެ ނަމުގައި މި ފައިސާ ދައްކާފައިވަނީ ކާކު ކަމެއް އަދި ސާފެއް ނުވެއެވެ.
އެމެރިކާގެ މަޝްހޫރު ލަވަކިއުންތެރިޔާ އާރް ކެލީއާއި ދެކޮޅަށް، ޖިންސީ ގޯނާއާއި ފުރައްސާރައިގެ 10 ދައުވާއެއްވެސް ހުސްވި މަހު ވަނީ އުފުލާފައެވެ. މިއީ ހަތަރު އަންހެނަކަށް ޖިންސީ ގޯނާ ކުރި މައްސަލާގައި ކުރާ ދައުވާތަކަކަށްވާއިރު، މީގެ ތެރޭގައި ތިން ކުޑަކުދިންވެސް ހިމެނެއެވެ.
މި ދައުވާތަކަށް އާރް ކެލީ އިންކާރުކުރިއިރު، ކަފާލާތުގެ ދަށުން އޭނާ މިނިވަން ކުރީ ތިން ދުވަހު ޖަލުގައި ބެހެއްޓުމަށް ފަހުގައެވެ.
އާރް ކެލީގެ ލަވަތައް ބޮއިކޮޓް ކުރުމުގެ ކެމްޕޭންތައް ފަށާފައިވާއިރު، އޭނާއާއިއެކު ހަދާފައިވާ ރެކޯޑިންގް އެގްރީމަންޓްވެސް މިހާރުވަނީ ބާތިލުކޮށްފައެވެ.
