ރައީސް އިބްރާހީމް މުހައްމަދު ސޯލިހުގެ ވެރިކަން ވެއްޓިއްޖެ ނަމަ އޭގެ އަޑީގައި ހުންނަވާނީ ކުރީގެ ރައީސް މުހައްމަދު ނަޝީދު ކަމަށް، ޖުމްހޫރީ ޕާޓީގެ ލީޑަރު ގާސިމް އިބްރާހީމް މިރޭ ވިދާޅުވެއްޖެއެވެ.

ގާސިމް މިހެން ވިދާޅުވީ، ޖޭޕީން އިދިކޮޅު ފަރާތްތަކާއި ގުޅިގެން ރައީސް ސޯލިހުގެ ސަރުކާރު ވައްޓާލަން މަސައްކަތް ކުރާކަމަށް އެމްޑީޕީން ތުހުމަތު ކުރުމާއި ގުޅިގެންނެވެ. އެކަމަށް ރައްދު ދެއްވަމުން ގާސިމް ވިދާޅުވީ، ނަޝީދަކީ އަމިއްލަފުޅަށް ވެރިކަން ކުރައްވަން އެނގިވަޑައިގެން ނުގެން ވެރިކަމުން އިސްތިއުފާ ދެއްވި ބޭފުޅެއް ކަމަށާއި، އެކަމުގެ އަޑީގައި ހުންނެވީ ވެސް އެމަނިކުފާނު ކަމަށެވެ. އަދި ނަޝީދު ވެރިކަމުން ދުރަށް ޖެހިވަޑައިގަންނަވަން ޖެހިވަޑައިގަތީ ބަޔަކު ބަޢާވާތް ކޮށްގެން ނޫން ކަމަށާއި، އެއީ ނަޝީދު އަމިއްލަފުޅަށް ކުރެއްވި ބަޢާވާތެއް ކަމަށެވެ.

ރައީސް ސޯލިހުގެ ސަރުކާރު ވައްޓާލަން މަސައްކަތް ކުރައްވާ ވާހަކައާއި ގުޅިގެން ގާސިމް ވިދާޅުވީ މި ސަރުކާރު ހަލާކުކޮށްލާ ރައީސް ސޯލިހުގެ ސަރުކާރު ވައްޓާލަން ރާވާ ހުރިހާ ރޭވުމެއްގެ އަޑީގައި ހުންނަވާނީ ނަޝީދު ކަމަށެވެ. "އަޅުގަނޑަށް ކަމެއް ކުރާކަން އެނގިގެނެއްނޫން މިހެން މިބުނީ. ހަމަގައިމުވެސް ނުކޮށެއް ނުހުންނާނެ. މިހާރު ބަރުލަމާނީ ނިޒާމެއް ގެންނަން މިއުޅެނީ ކީއްވެގެންތޯ" ރައީސް ސޯލިހުގެ ސަރުކާރު ވައްޓާލައްވަން ނަޝީދު މަސައްކަތް ކުރައްވާކަމުގެ ތުހުމަތާއެކު ގާސިމް ވިދާޅުވިއެވެ.

ގާސިމް ވިދާޅުވީ ރައީސް ސޯލިހަކީ މިހާރު ރައްޔިތުންގެ މަޖިލީހުގެ މެންބަރެއް ނޫން ކަމަށާއި، ނަޝީދު މިހާރު މަސައްކަތް ކުރައްވަނީ ރައީސްކަން ކުރެއްވުމަށް ފަހު ރައްޔިތުންގެ މަޖިލީހުގެ މެންބަރަކަށް ވެވަޑައިގަތުމަށް ކަމަށެވެ. އަދި އެއީ ޕްރައިމް މިނިސްޓަރުކަމަށް ވަޑައިގަތުމަށް ކުރައްވާ ކަމެއް ކަމަަށް ގާސިމް ވިދާޅުވިއެވެ.

"އައިމަ ކިހިނެއްތޯ ދެން ކަންތައްތައް ވެގެންދާނީ. ބަރުލަމާނީ އަކަށް ވީމާ އޭނާ އަމިއްލައަށް ޕްރައިމް މިނިސްޓަރަކަށް ވާން އެއުޅެނީ. ރީތިކޮށް ސާފުކޮށް ބުނިވެސްމެ އަޅުގަނޑުމެން ކައިރީ. ތިމަންނާ ބޭނުންވަނީ އެހެންނޭ. ތިމަންނާއާއެކު ފަސްއަހަރު ވަންދެން ނޫޅެވޭނޭ. އަޅުގަނޑު ކައިރި ބުނި ޔޫރަޕްގައި ހުއްޓާ ފޯނު ކޯލެއް ކޮށްފައި. އަޅުގަނޑު ބުނިން ތިހެން ނަހައްދަވާށޭ ކަމަކު ނުދާނެ ނޫންހޭ. އެއްގޮތަކަށް ވެސް އެކަން ގަބޫލުކުރާ ގޮތެއް ނުވި" ގާސިމް ވިދާޅުވިއެވެ.

ގާސިމް ވިދާޅުވީ ބަޔަކު ބަޢާވާތް ކުރަން މަސައްކަތް ނުކުރާ ކަމަށާއި، ބަޢާވަތް ކުރަން އުޅުއްވަނީ ނަޝީދު އަމިއްލަފުޅަށް ކަމަށެވެ. "ދެންވެސް ކުރާނީ އޭނަ. ރާވާނީ ވެސް އޭނަ. އެހުރިހާ ކަމެއް ކުރިއްޔާ ކުރާނީ އޭނަ. އަޅުގަނޑުމެން ނޫޅެން އެއްވެސް ކަމެއް ކުރާކަށް" ގާސިމް ވިދާޅުވިއެވެ.

ބަޢާވާތަކުން ރައީސް ސޯލިހުގެ ސަރުކާރު ނަޝީދު ވައްޓާލައްވަފާނެ ކަމަށް ގާސިމް ވިދާޅުވެފައިވާ އިރު، އިދިކޮޅު ކޯލިޝަނުން ވެސް ވަނީ އެމްޑީޕީން މި ސަރުކާރު ވައްޓާލަން މަސައްކަތް ކުރާކަމުގެ ތުހުމަތު ވެސް ކުރައްވާފައެވެ.

ސިޔާސީ