ކުރީގެ ރައީސް އަބްދުﷲ ޔާމީން ޖަލަށް ގެންދެވުނު ފަހުން، ޕީޕީއެމާއި ޕީއެންސީގެ ކޮންޓްރޯލް ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ (އަދުރޭ) ނަންގަވައި، ޕާޓީ ހައިޖެކް ކުރައްވައިފައިވާ ކަމަށް ބުނެ ޒާހިދު ރަމީޒު (ޒާހިދު ކުރިއޭޓާ) ޕީޕީއެމުން ވަކިވެއްޖެއެވެ.
ޕީޕީއެމްގެ ޓިކެޓްގައި ހިތަދޫ މެދު ދާއިރާއަށް ވާދަކުރާ ޒާހިދު ޕީޕީއެމްއިން ވަކިވާން ފޮނުވި ސިޓީގައި ބުނެފައިވަނީ ޔާމީން ޖަލަށް ގެންދިޔަ ދަނޑިވަޅު ބަލައި، އަބްދުއްރަހީމް އަބްދުﷲއާ އޭނާ ކޮންޓްރޯލް ކުރައްވައި މަދު ބަޔަކު ޕީޕީއެމް އަދި ޕީއެންސީގެ ކޮންޓްރޯލް ނުހައްގުން ނަންގަވައިގެން، ޔާމީނުގެ ނަންފުޅު ބޭނުން ކުރައްވައިގެން، އެކި ގޮތްގޮތުން ޕާޓީ ގަޑުބަޑު ކުރައްވައި މުޅި ޕާޓީ ހައިޖެކް ކުރައްވައިފައި ވާ ކަމަށް ބުނެފައެވެ.
"ހިތަދޫ މެދު ދާއިރާއަށް ކެމްޕޭން ފަށާ، އެތަކެއް ރައްޔިތުންނަކާ ބައްދަލުކޮށް ތާއިދު ހޯދަމުން ދަނިކޮށް، މި ދެންނެވި މީހުން ވަނީ މަހުޖަނެއްގެ ޕާޓީއަށް އެ ދާއިރާރު ތާއިދު ވިއްކާލާ، އަޅުގަނޑުގެ ހައްގުތައް އެންމެ މަތީ އަގު ދިން ފަރާތަކަށް ނީލަން ކިޔާފަ" ޒައިދު ފޮނުވި ސިޓީގައި ބުނެފައި ވެއެވެ.
މީގެ އިތުރުން ކެބިނެޓާއި ކައުންސިލްގައި އަދި ޕާޓީގެ އެތެރެއާއި ބޭރުގައި ތިބި ޔާމީނަށް ވަފާތެރި އިހްލާސްތެރިން އެކަހެރިކޮށް، ޕާޓީން ބާކީކޮށް، ޕާޓީގެ މެންބަރުންނާއި މުޅި ގައުމު ބަލައި ނުގަންނަ މަދު ބަޔަކު ޕާޓީގެ މުޅި ނިޒާމަށް އަތްގަދަކޮށްފައި ވުމަކީ ރިޔާސީ އިންތިހާބުގައި ބަލިވި އެއް ސަބަބު ކަމަށް ޒާހިދު ބުނެފައި ވެއެވެ.
މީގެ އިތުރުން ގައުމީ މަސްލަހަތާއި ޔާމީންގެ ތަސައްވުރަށްވުރެ ފައިސާގެ ދަހިވެތިކަން އިސްކޮށް، ކެމްޕޭން ކުރުމަށް ކަނޑައަޅާފައިވާ ފައިސާއާއި ވަސީލަތްތަކަށް ހިޔާނާތްތެރިވި ކަމަށް ވެސް ޒައިދު ވަނީ ޔާމީނަށް ފޮނުވި ސިޓީގައި ބުނެފައެވެ.
"އަމިއްލަ އެދުމާއި ޒާތީ ތައައްސުބުން ފުރިގެން ތިބި ފައިސާއާއި މުދާވެރިކަމަށް އަޅުކަންކުރާ ބަޔަކު ކުރިމަތީ އަޅުގަނޑު ކުޑަކަކޫ ނުޖަހާނެ. އަދި މަނިކުފާނު [ޔާމީން] ގެންގުޅުއްވި ޒުވާނުންނަށް އިސްކަން ދެއްވުމުގެ ސިޔާސަތު އުވާލާފައިވާތީ އަދި މަނިކުފާނުގެ ބަހުގެ އަގު ވައްޓާލާ ޕާޓީގެ ނަން ކިލަނބު ކުރަމުންދާތީ އަދި ގައުމު ފަސާދަ ކުރަމުންދާ މަހުޖަނަކަށް ޕާޓީގެ ޓިކެޓްތައް ވިއްކަމުންދާތީ، މިއަދުން ފެށިގެން ޕާޓީގެ ކައުންސިލުންނާއި މެންބަރު ކަމުން ވަކިވާން ނިންމި ވާހަކަ ދަންނަވަން" ޒާހިދު ފޮނުވި ސިޓީގައި ބުނެފައިވެއެވެ.
ޒާހިދު ޕީޕީއެމުން ވަކިވި އިރު، އިއްޔެ ވަނީ އެ ޕާޓީގެ ކައުންސިލް މެންބަރު އަދި ކުރީގެ ހޯމް މިނިސްޓަރު އަޒްލީން އަހުމަދު ވެސް ޕާޓީން ވަކިކުރަން ނިންމާފައެވެ. އަޒްލީންގެ އިތުރުން އިތުރު ފަސް މީހަކަށް ފިވަޅު އެޅުމަށް ޕީޕީއެމްގެ ސުލޫކީ ކޮމިޓީން ވަނީ ނިންމާފައެވެ.
އަޒްލީން ޕާޓީން ވަކިކުރަން ނިންމީ، އަދުރޭގެ ދަރިފުޅު ފައިސަލް މަޖިލިހުގައި ވާދަކުރާ ހުޅުމާލެ ދާއިރާއަށް އަޒްލީން އަމިއްލަ ގޮތުން ވާދަކުރައްވަން ނިންމެވުމާއި ގުޅިގެންނެވެ.
