ވެރިކަމަށް ގެންނަން މަސައްކަތް ކުރި މީހުންގެ މަތިން ހަނދާން ނައްތާނުލައްވާ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެއެވެ.
އެމްޑީޕީ ޓިކެޓްގައި ހުޅުދޫ ދާއިރާއަށް ވާދަކުރައްވާ އިލްޔާސް ލަބީބުގެ ކެމްޕޭން އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ މި އިންތިހާބު ކާމިޔާބު ކުރުމުގައި އެމްޑީޕީ އާއި ޖުމްހޫރީ ޕާޓީއާއި އަދާލަތު ޕާޓީ އަދި އެމްއާރުއެމާއި އެތައް އަމިއްލަ ފަރާތްތަކެއް ބުރަ މަސައްކަތެއް ކުރިކަން އަދިވެސް ހަނދާނުގައި އެބަހުންނެވި ކަމަށެވެ.
ރައީސް ވިދާޅުވީ އެމަނިކުފާނުގެ ސަރުކާރުން ކުރާ އެއްވެސް ކަމަކުން އެއްވެސް ދިވެހި ރައްޔިތަކަށް ގެއްލުމެއް ދެރައެއް ލިބިގެން ނުދާނެކަމަށެވެ.
"އަޅުގަނޑު މިއަދުވެސް ތިބޭފުޅުންނަށް ހުރިހާ ޕާޓީއެއްގެ ހުރިހާ ބޭފުޅުންނަށް މި ދަންނަވަނީ ތިއިން އެއްވެސް ބޭފުޅަކަށް އަޅުގަނޑުމެން މިކުރާ މަސައްކަތުން ދެރަ ގޮތެއް، ނުވާނެ، އަޅުގަނޑުމެންނާ އެކީ ތިއްބަވާށޭ" ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނު ރައީސްކަމަށް ދިވެހި ރައްޔިތުން ހޮއްވެވީ މާރީތި މީހަކަށް ވެގެން މާ ކުލަ އަލި މީހަކަށް ވެެގެން ނޫން ކަމަށެވެ. އަދި އެމަނިކުފާނު ރައީސްކަމަށް ހޮއްވެވީ ވެވަޑައިގެންނެވި ވައުދުތަކެއްގެ މައްޗަށް ކަމަށެވެ.
"ތިބޭފުޅުން އަޅުގަނޑު ހޮވީ ވައުދުތައް ފުއްދާނެކަމުގެ ޔަގީންކަމެއް ތިބޭފުޅުންގެ އޮތީތީ. ފުރަތަމަ ދުވަހުން ފެށިގެން ވެރިކަމާއި ހަވާލުވީ ފުރަތަމަ ދުވަހުން ފެށިގެން އަޅުގަނޑު މިދަނީ [ވައުދު ފުއްދުމުގެ މަސައްކަތް] ކުރަމުން އަދި ކުރިއަށް އޮތީ އެގޮތަށް" ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނު ވެވަޑައިގެންނެވި ވައުދުތައް ފުއްދުމަށް މަޖިލީހުގައި އެކަމަށް ތާއިދު ކުރައްވާ މެންބަރުން ތިބުން މުހިންމު ކަމަށެވެ. އަދި އެކަމަށް ތާއިދުކުރާ އެކަން ކުރެވޭނެ މީހުން މަޖިލީހުގައި ތިބެންޖެހޭ ކަމަށް ރައީސް ވިދާޅުވިއެވެ.
