މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަ ބަލާ ކޮމިޝަނާއި، ދައުލަތުގެ ފައިސާއަށް ހިޔާނާތްވެފައިވާ މައްސަލަތައް ބެލުމަށް ރައީސް އިބްރާހީމް މުހައްމަދު ސޯލިހު އުފައްދަވާފައިވާ ރިޔާސީ ކޮމިޝަނަށް ބާރުދިނުމަކީ ގާނޫނުއަސާސީއާ ހިލާފްކަމެއް ކަމަށާއި، އެ މަސައްކަތް ކުރައްވަނީ މުއައްސަސާތަކުގެ ބާރު ނަގާ ކޮކްޓެއިލް ހައްދަވަން ކަމަށް ޖުމްހުރީ ޕާޓީގެ ލީޑަރު ގާސިމް އިބްރާހީމް ވިދާޅުވެއްޖެއެވެ.
ކޯލިޝަންގެ ދެވަނައަށް އެންމެ ބޮޑު ޕާޓީގެ ލީޑަރު އަދި މަޖިލީހުގެ ރައީސްކަން ވެސް ކުރައްވާ ގާސިމް މިހެން ވިދާޅުވީ ތިމަރަފުށީ ދާއިރާއަށް އެޕާޓީގެ ޓިކެޓްގައި ވާދަކުރައްވާ އަބްދުﷲ ރިޔާޒުގެ ކެމްޕޭން ޖަލްސާއެއްގައެވެ.
މީގެ ކުރިން މަޖިލީހުގައި ކޯރަމް ހަމަނުކޮށް ފާސްކުރި ގާނޫނުތަކުގެ ސަބަބުން އެކަމުގެ ގެއްލުން ލިބެމުންދާކަން ފާހަގަކުރައްވަމުން ގާސިމް ވިދާޅުވީ ގާނޫނުއަސާސީން އިން ކަނޑައަޅާ މުއައްސަސާތަކަށް ދީފައި ހުރި ބާރުތައް ފުރޮޅާލައި ކޮމިޝަނަކަށް ދިނުމަކީ ކަނޑައެޅިގެން ގާނޫނު އަސާސީއާއި ހިލާފްކަމެއް ކަމަށެވެ.
"ދެން މިއަދު އަޅުގަނޑުމެން ވީތޯ، ރައްޔިތުންގެ މަޖިލީހުން ފާސްކުރަން، ކަނޑައެޅިގެން ދިވެހިރާއްޖޭގެ ގާނޫނުއަސާސީއާއި ތައާރަޒުވާ، ގާނޫނުއަސާސީން އިން ވަކިކޮށް މިން ވަކިކޮށްފައި ހުރި އެކި އެކި މުއައްސަސާތަކަށް ދީފައި ހުރި ބާރުތައް ފުރޮޅާލާފައި ކޮންމެވެސް ކޮމިޝަނެއް ހަދާ ކޮމިޝަނުގެ މައްޗަށް ބާރުވެރިކަން ދީގެން މި ހުރިހާ މުއައްސަސާއެއް (އެންޓިކޮރަޕްޝަން ކޮމިޝަން، ޕީޖީ، ފުލުހުން، އެޗްއާރުސީއެމް) އެއްކޮށްލައިގެން އެންމެ ހަތަރު ފަސް މީހެއްގެ މައްޗަށް އެކުލެވޭ ބަޔަކަށް އުފައްދާފައި އޮންނަ ކޮމިޝަނަކަށް ބާރުދޭން" ގާސިމް ވިދާޅުވިއެވެ.
އޭނާ ވިދާޅުވީ ގާނޫނުއަސާސީގައި ކަނޑައެޅި ބަޔާންވެގެން ހުރި ކަންތައްތަކެއް އަނެއް އަތަށް، ކޮމިޝަނެއް ހަދާ އެ ކޮމިޝަނަށް ބާރުދޭކަށް، ޑުބްލިކޭޓްވާ ގޮތަކަށް ކަންކަން ކުރުމަކީ ގާނޫނުއަސާސީ ހުއްދަކުރާ ކަމެއް ނޫން ކަމަށެވެ. "އެގޮތަށް އެކަންކަން ކުރާނަމަ އެދަނީ ނުބައިމަގުން، އެދަނީ ގޯސް މަގުން. އެދަނީ ރަނގަޅަށް ނޫން" ގާސިމް ވިދާޅުވިއެވެެ.
މީގެ ކުރިންވެސް ރައީސުން ކޮމިޝަން އުފެއްދެވިކަން ފާހަގަކުރައްވާ ގާސިމް ވިދާޅުވީ، ގާނޫނެއް ހަދައިގެން، ދައުލަތުގެ ހުރިހާ މުއައްސަސާތަކުގެ ބާރުތައް ކޮކްޓެއިލްއަކަށް ހަދައިގެން، އެ ނަންގަވާ، ރައީސް 115 ވަނަ މާއްދާގެ (ގ) ގެ ދަށުން އުފައްދަވާފައިވާ ކޮމިޝަނަކަށް ދޭން އެއްގޮތަކަށް ވެސް އެބޭފުޅުން (މަޖިލިސް މެންބަރުުން) ނޫޅުއްވާ ކަމަށެވެ.
"އެގޮތަށް ކޮކްޓެއިލްއެއްގެ ތެރެއަށް ލައިގެން ކޮމިޝަނަށް (ބާރު) ދިނުމަކީ ގާނޫނު އަސާސީއާއި އޭގެ ރޫހާ އެއްގޮތްވާކަމެއް ކަމަށް އަޅުގަނޑު ނުދެކެން. އެހެންވީމަ އަޅުގަނޑުމެން ކޮމިޝަނަށް ބާރުދޭ ވާހަކަ ދައްކާ އިރު، ދެން އަންނަނީ ކޮން ކަމެއްތޯ އަޅުގަނޑުމެން ވިސްނާލަން ޖެހޭ. ކަށްޗަށް އެޅިއްޖެ ބިންގަލެއް ކެއްޗާހަމައަށް ދާއިރު އޮންނާނީ ކައްޗަށޭ ބުނާ ގޮތަށް އެއީ ރަނގަޅު ބިންގަލަކަށް ނުވާނެ." ގާސިމް ވިދާޅުވިއެވެ.
ގާސިމްގެ ފާޑުކިޔުންތައް ރައީސް ސޯލިހުގެ ކޮމިޝަންތަކަށް އަމާޒުވެފައިވާއިރު، ގާސިމް ވަނީ އިދިކޮޅު ޕްރޮގްރެސިވް ކޯލިޝަންގެ ކެންޑިޑޭޓުންނަށް ތާއިދުކުރައްވާ ކަން ވެސް ރަސްމީކޮށް ހާމަކުރައްވާފައެވެ. އެގޮތުން ޖޭޕީން ވާދަ ނުކުރާ ދާއިރާތަކުގެ އިދިކޮޅު ކެންޑިޑޭޓުންނަށް ތާއިދުކުރައްވާނެ ކަމަށް ގާސިމް ރޭ ވަނީ ހާމަކުރައްވާފައެވެ.
