އަންނަ މަހު ބާއްވާ މަޖިލިސް އިންތިހާބުގައި، ޖުމްހޫރީ ޕާޓީން ވާދަ ނުކުރާ ދާއިރާތަކަށް ކުރިމަތިލާ އިދިކޮޅު ޕްރޮގްރެސިވް ކޯލިޝަންގެ ކެންޑިޑޭޓުންނަށް ތާއިދުކުރެއްވުމަށް ޖޭޕީގެ ލީޑަރު ގާސިމް އިބްރާހީމް ނިންމަވައިފިއެވެ.
ޖޭޕީން އިދިކޮޅު ކެންޑިޑޭޓުންނަށް ތާއިދު ކުރާކަން ރަސްމީކޮށް އިއުލާން ކުރައްވައިފައިވަނީ، މިރޭ ޖޭޕީން ބޭއްވި ޖަލްސާއެއްގައެވެ. މިކަމުގެ މާބޮޑު ތަފްސީލެއް ހާމަ ނުކުރެއްވި ނަމަވެސް، މާދަމާ އޭގެ ތަފްސީލު ނޫސްވެރިންގެ ބައްދަލުވުމެއްގައި ހާމަ ކުރައްވާނެ ކަމަށް ގާސިމް ވިދާޅުވިއެވެ.
އިދިކޮޅު ކެންޑިޑޭޓުންނަށް ތާއިދު ކުރައްވާކަން ހާމަކުރައްވަމުން ގާސިމް މިރޭ ވިދާޅުވީ ޕްްރޮގްރެސިވް ކޯލިޝަނުން ޖޭޕީގެ ކެންޑިޑޭޓުންނަށް ތާއިދު ކުރައްވަން ނިންމަވާފައި ވަނީ އެޕާޓީން ކުރިމަތިނުލާ ދާއިރާތަކަށް ކަމަށެވެ. އަދި ޖޭޕީންވެސް ކަންތައް ކުރައްވާނީ އެގޮތަށް ކަމަށް ގާސިމް ވިދާޅުވިއެވެ.
"ހަމައެހެންމެ އިން ރިޓާން އަޅުގަނޑުމެން ވެސް އޮންނާނީ ހަމަ ގޮނަކަށް ގޮނެއް. ޖުމްހޫރީ ޕާޓީންވެސް، އެ ޕާޓީން ކުރިމަތި ނުލާ ދާއިރާތަކުގެ ކެންޑިޑޭޓުންނަށް ޖުމްހޫރީ ޕާޓީގެ ނަމުގައި އާއި އަޅުގަނޑުގެ އަމިއްލަ ނަމުގައި ތާއީދު ކުރާ ވާހަކަ ދަންނަވާލަން" ގާސިމް ވިދާޅުވިއެވެ.
ބަދަލުގައި އިދިކޮޅު ކޯލިޝަންގެ ކެންޑިޑޭޓުންނަށް ތާއިދު ކުރައްވާނެކަން ހާމަކުރެއްވި އިރު، ރޭ ޕީޕީއެމް ޕީއެންސީން ބޭއްވި ބައްދަލުވުމެއްގައި ވަނީ ޖޭޕީގެ 27 މެންބަރުންނަށް ތާއިދު ކުރާނެކަން ހާމަކޮށްފައެވެ.
