ހޫނުގަދަވަމުންދާ އިންޑިއާއާއި ޕާކިސްތާނުގެ މަސްރަހާއި ބެހޭ ގޮތުން ޖޯކުޖެހުނުކަމަށްޓަކައި މަޝްހޫރު ކޮމީޑިއަން ޓްރެވާ ނޯއާ މައާފަށް އެދިއްޖެއެވެ.
ދަ ޑެއިލީ ޝޯގައި ވާހަކަ ދައްކަމުން ޓްރެވާ ނޯއާ ވަނީ، އިންޑިއާއާއި ޕާކިސްތާނާއި ދެމެދު ކުރާ ހަނގުރާމައަކީ އެންމެ "މުނިފޫހިފިލާނެ" ހަނގުރާމައަށްވާނެ ކަމަށާއި، އެ ހަނގުރާމައަކީ އެންމެ ދިގުދެމިގެންދާނެ ހަނގުރާމައަށް ވާނެއިރު، އެއީ ފެންނަ އިތުރު ނެށުންގަނޑެއް ކަމަށެވެ.
ޓްރެވާ ނޯއާގެ ވާހަކަތަކާއި ގުޅިގެން އެންމެ ބޮޑަށް ރުޅިގަދަވެފައިވަނީ އިންޑިއާއެވެ. އެގޮތުން އިންޑިއާގެ ގިނަ ބަޔަކު ވަނީ ޓްރެވާ ނޯއާއި ދެކޮޅަށް ޓުވިޓާގައި އަޑުއުފުލާފައެވެ.
ޓްރެވާ ނޯއާއަކީ ނަސްލީ ތަފާތުކުރުންތައް ގެންގުޅޭ މީހެއް ކަމަށާއި، އޭނާ ވަނީ ބޮލީވުޑްއޭ ކިޔައިގެން މީހުން ޖަހާ ހަޖުލުގެ ތެރެއަށް ސީރިއަސް ހަނގުރާމައެއްގެ ވާހަކަ އެއްކޮށްފައި ކަމަށްވެސް އަނެއް ބަޔަކު ވަނީ ބުނެފައެވެ.
ޓްރެވާ ބުނީ އޭނާ ޖޯކާއި ހަޖޫ ޖަހާ ހަދަނީ ހިތްދަތިކަމާއި ތަކުލީފުތަކަށް ލުއި ހޯދުމަށްކަމަށާއި އޭނާގެ މަންމަ އަމިއްލަ ބޮލަށް ބަޑިޖެހިއޭ ކިޔައިގެން ޖޯކުޖަހާފައި ހުންނާނެ ކަމަށެވެ. އަދި އިންޑިއާއާއި ޕާކިސްތާނުގެ ހަގީގީ ދެބަސްވުންތަކުގެ މައްޗަށް، އޭނާ ދެއްކި ވާހަކަތަކެއް ގަދަވީތީ އެކަމާއި ހައިރާންވާކަމަށްވެސް ޓްރެވާ ނޯއާ ވަނީ ބުނެފައެވެ.
ކަންމިހެންއޮތްއިރު، އިންޑިއާއާއި ޕާކިސްތާނު މައްސަލައާއި ގުޅިގެން އިންޑިއާ ކޮޅަށް ވާހަކަ ދައްކަމުން ޕްރިޔަންކާ ޗޯޕްޅާއަތުން އދގެ ގުޑްވިލް އެމްބެސެޑާ ކަމުގެ ޝަރަފު ނެގުމަށް އދއަށް ގޮވާލާ ޕެޓިޝަނެއް ތައްޔާރު ކުރުމުގެ މަސައްކަތް ޕާކިސްތާނުން ކުރަމުން އަންނަ ކަމަށް ޚަބަރު ލިބެއެވެ.
