ކުޑަކުދިންނާއި "ބެހި" ޖިންސީ ގޯނާކުރިކަމުގެ ތުހުމަތުތަކެއް އަމާޒުވެފައިވާ ޕޮޕްލަވައިގެ ރަސްގެފާނު މައިކަލް ޖެކްސަން (އެމް.ޖޭ)ގެ ލަވަތައް ބްރޯޑްކާސްޓު ނުކުރުމަށް، ބައިނަލްއަގުވާމީ ފެންވަރުގައި ޚަބަރާއި މުނިފޫހިފިލުވުމުގެ ޕްރޮގްރާމްތައް ބްރޯޑްކާސްޓުކުރަމުން އަންނަ ބްރިޓިޝް ބްރޯޑްކާސްޓިންގް ކޯޕަރޭޝަން (ބީބީސީ)ގެ ރޭޑިއޯ 2އަކުން ނިންމައިފިއެވެ.
2009 ވަނަ އަހަރު މިދުނިޔެ ދޫކޮށްފައިވާ އެމް.ޖޭއާއި ބެހޭ ގޮތުން ހުތުރު ވާހަކަތަކެއް ފެންމަތިކޮށްފައިވަނީ "ލީވިންގް ނެވާލަންޑް"ގެ ނަމުގައި އުފައްދާފައިވާ 4 ގަޑިއިރުގެ ޑޮކިއުމަންޓްރީ ފިލްމެއްގައެވެ.
މި ތުހުމަތުތަކާއި ގުޅިގެން މައިކަލް ޖެކްސަންގެ ލަވަތައް ބްރޯޑްކާސްޓް ނުކުރުމަށް ބީބީސީއިން ނިންމާ، އޭނާގެ ލަވައެއް ބްރޯޑްކާސްޓު ނުކުރާތާ މިހާރު ހަފުތާއެއްހާ ދުވަސްވެފައިވާކަމަށް މައުލޫމާތު ލިބެއެވެ.
އެޗް.ބީ.އޯއާއި ޗެނަލް 4 ގުޅިގެން އުފައްދާފައިވާ "ލީވިންގް ނެވާލަންޑް" ޑޮކިއުމަންޓްރީގައި ވާހަކަ ދައްކާފައިވާ ވޭޑް ރޮބްސަންއާއި ޖޭމްސް ސޭފްޗަކް ބުނާ ގޮތުގައި އެމީހުން ކުޑައިރު މައިކަލް ޖެކްސަންގެ ފަރާތުން ޖިންސީ ބޮޑެތި ގޯނާތަކެއް ވަނީ ކުރިމަތިވެފައެވެ. އެގޮތުން ޖިންސީ އަމަލުތައް ހިންގަން ދަސްކޮށްދިނީ މައިކަލް ކަމަށާއި، މައިކަލް އެމީހުން ރޭޕްކޮށްފައިވާކަމަށްވެސް އެ ދެމީހުންވަނީ މި ޑޮކިއުމަންޓްރީގައި ކިއާދީފައެވެ.
އެޗް.ބީ.އޯއިން މި ހަފުތާ ތެރޭގައި މި ޑޮކިއުމަންޓްރީ ދައްކާއިރު، އޯޕްރާ ވިންފްރޭއަށް މި ދެމީހުން ދީފައިވާ އިންޓަވިއުތަކެއް ހޯމަ ދުވަހުގެ ވަގުތެއްގައި ދުރަށް ފޮނުވާނެ ކަމަށް މައުލޫމާތު ލިބެއެވެ.
