ޕާކިސްތާނު ނެތިކޮށްލަން ގޮވީ ހަމަ ގޮވަންވެގެން ކަމަށާއި، އޭއީ އޭނާގެ ހިތުގެ ޝުއޫރުތައް ކަމަށް ބޮލީވުޑްގެ އެކްޓްރެސް ކަންގަނާ ރެނޯޓް ބުނެފިއެވެ.
"މަނިކާރާނިކާ: ދަ ކުއީން އޮފް ޖާންސީ"ގެ ޕްރޮމޯޝަނަލް އިވެންޓެއްގައި ވާހަކަ ދައްކަމުން ކަންގަނާ ބުނީ ޕާކިސްތާނާއި ގުޅިގެން އޭނާ ފާޅުކުރީ ހިތުގައި ކުރެވެމުންދިޔަ އިހުސާސްތަކެއް ކަމަށާއި، ހިތުގެ ޝުއޫރުތައް ބަންޑުންކޮށްލުމަކީ ހަމަ އެންމެ ރަނގަޅު ކަމެއް ކަމަށެވެ.
ކަޝްމީރުގެ އިންޑިއާއާއި ވީ ފަޅީގައި، ޕާކިސްތާނުގެ ހަނގުރާމަވެރި ޖަމާއަތަކަށް ނިސްބަތްވާ މީހަކު އަމިއްލައަށް މަރުވެގެން ދިން ހަމަލާގައި އިންޑިއާގެ 40 އަށްވުރެ ގިނަ ޕެރާމިލިޓްރީ ފުލުހުންގެ ފުރާނަ ގެއްލިދޔަ ހާދިސާއާއި ގުޅިގެން ބޮލީވުޑުން ޕާކިސްތާނުގެ ފަންނުވެރި ބޭންކޮށްފައިވާއިރު، އެ ހާދިސާއާއި ގުޅިގެން ކަންގަނާ ބުނީ ޕާކިސްތާން ބޭން ކުރުމަކުން ނިމުނީ ނޫންކަމަށާއި، ޕާކިސްތާނަކީ ނެތިކޮށްލަންޖެހޭ ގައުމެއް ކަމަށެވެ.
ކަންގަނާގެ މި ވާހަކަތަކާއި ގުޅިގެން އޭނާއަށް އަމާޒުވި ފާޑުކިއުންތަކަށް ރައްދު ދެމުން ކަންގަނާ ބުނީ، މިޒާތުގެ އިހުސާސްތަކަކީ އެ ފަދަ ހާދިސާއަކާއި ކުރިމަތިލާންޖެހޭ ހަމަ ކޮންމެ މީހަކަށްވެސް ކުރެވިދާނެ އިހުސާސްތަކެއް ކަމަށެވެ. އެ ހަމަލާއަކީ ފުން ލަކުނެއް ލައްވާލި ހާދިސާއެއް ކަމުގައިވެސް ކަންގަނާ ވަނީ ސިފަކޮށްފައެވެ.
ކަންގަނާ ވަނީ އިންޑިއާއާއި ޕާކިސްތާނު ހިއްސާކުރާ ސަރަހައްދީ އިމަށް ގޮސް، މީހެއްގެ އަތުން ބަޑިއެއް ވަގަށް ނަގައިގެން ދެން ކުރަންޖެހުނު ކަމެއް ކުރަންވެސް އޭނާގެ ހިތަށް އެރި ކަމަށެވެ.
