ނެޓްފްލިކްސްއާއި ވާދަކުރުމަށް ތައާރަފުކުރާ "ބްރިޓްބޮކްސް" މަޝްރޫއު މިހާރު އޮތީ އެންމެ ފަހުގެ މަރުހަލާގައި ކަމަށާއި، މިއަހަރުގެ ފަހު 6 މަސްދުވަހުގެ ތެރޭގައި މި ހިދުމަތް ލިބެން ފަށާނެ ކަމަށް މިކަމުގައި އިސްކޮށް ހަރަކާތްތެރިވާ ބީބީސީގެ ޑައިރެކްޓާ ޓޯނީ ހޯލް ހާމަކޮށްފިއެވެ.
އައިޓީވީއާއި ބީބީސީ ގުޅިގެން އުފައްދާ ބްރިޓްބޮކްސްގެ ހިދުމަތް އެންމެ ފުރަތަމަ ލޯންޗުކުރުމަށް ހަމަޖެހިފައިވަނީ އިނގިރޭސިވިލާތުގައެވެ.
އައިޓީވީގެ ޗީފް އެގްޒެކެޓިވް ކެރޮލީން މެކްކޯލް ބުނީ މި ހިދުމަތަކީ އިނގިރޭސިވިލާތުގެ އުފެއްދުންތެރިކަން ހާމަކުރުމަށް އޮތް ރަނގަޅު ޕްލެޓްފޯމެއް ކަމަށެވެ.
ނެޓްފްލިކްސްއާއި ބްރިޓްބޮކްސް ވަރަށް ގާތުން ވާދަކުރާނެ ކަމަށް ހަބަރު ލިބޭއިރު، ބްރިޓްބޮކްސްގެ މަހުފީ އުޅެނީ ގާތްގަނޑަކަށް 5 ޕައުންޑަށް ކަމަށް އަޑުތައް ވަނީ ފެތުރިފައެވެ.
ނެޓްފްލިކްސްއާއި ވާދަކުރުމަށް ތައާރަފުކޮށްފައިވާ ނައުޓީވީއާއި ޕްރައިމް ވީޑީއޯގެ ހިދުމަތްތައްވެސް މިހާރު އަންނަނީ ގިނަ ބައެއްގެ މެދުގައި ބޮޑު މަގުބޫލުކަމެއް ހޯދަމުންނެވެ.
