ޕީޕަލްސް ރިޕަބްލިކް އޮފް ޗައިނާ އުފެދުނުތާ 77 އަހަރު ފުރުމުގެ ގައުމީ ދުވަހުގެ މުނާސަބަތުގައި، ޗައިނާ އާއި ރާއްޖެއާ ދެމެދު އޮތް ގާތް ގުޅުން އަބަދުވެސް ވަރަށް ބޮޑަށް ބަލައިގަންނަ ކަމަށާއި އެ ގުޅުމަށް އަބަދުވެސް މަރުހަބާ ކިޔާ ކަމަށް ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ކޮންގ ޝިންހުއާ ވިދާޅުވެއްޖެއެވެ.
ސަފީރު ކޮންގ ޝިންހުއާ މީސްމީޑިއާ މަންސަ "އެކްސް" މެދުވެރިކުރައްވައި ރާއްޖެއަށް އަމާޒުކުރައްވައި ފޮނުއްވި މެސެޖުގައި ވިދާޅުވީ، މިއަދަކީ ޗައިނާގެ 77 ވަނަ ގައުމީ ދުވަސް ކަމަށާއި، މި އުފާވެރި މުނާސަބަތުގެ އުފާ ދެ ގައުމުގެ ރައްޔިތުންވެސް އެކުގައި ހިއްސާކުރަމުންދާ ކަމަށެވެ. އަދި ރާއްޖޭގެ ރައްޔިތުންނަށް ދުވަހުގެ ހެޔޮއެދުންތައްވެސް ވަނީ އަރިސްކުރައްވާފައެވެ.
މީގެއިތުރުން ސަފީރު ފާހަގަކުރެއްވި ގޮތުގައި، 2024 ވަނަ އަހަރު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޗައިނާއަށް ކުރެއްވި ދަތުރުފުޅުގައި އެ ގައުމުގެ އެންމެ އިސް ލީޑަރުންނާއެކު ބޭއްވުނު ބައްދަލުވުމަކީ، ދެ ގައުމުގެ ދެމެދުގައި އޮތް "ކޮމްޕްރިހެންސިވް ސްޓްރެޓީޖިކް ކޯޕަރޭޓިވް ޕާޓްނަޝިޕް" އިތުރަށް ވަރުގަދަކޮށް، ގުޅުމުގެ ބިންގާ ސާބިތުކޮށްދިން މުހިންމު ފިޔަވަޅެކެވެ.
ސަފީރުގެ މެސެޖު ނިންމަވާލައްވަމުން ވަނީ، ދެ ގައުމުގެ ދެމެދުގައި އޮތް ޒަމާންވީ އެކުވެރިކަމާއި އެއްބާރުލުން ކުރިމަގުގައިވެސް ދެމިއޮތުމަށް އެދިވަޑައިގެން، އިޚްލާޞްތެރި ހެޔޮއެދުންތައް ތަކުރާރުކުރައްވާފައެވެ.
