މާލޭގެ ބޮޑުތަކުރުފާނުމަގުގައި ގަވާއިދާ ހިލާފަށް ޕާކުކޮށްފައިވާ އުޅަނދުތައް ނެގުމަށް ދިވެހި ފުލުހުންގެ ހިދުމަތުން ފަށާފައިވާ ހާއްސަ މަސައްކަތުގެ ތެރެއިން، އިއްޔެ ރޭއިން ފެށިގެން މިހާތަނަށް ހަތަރު ފުރޮޅުލީ 9 އުޅަނދެއް ޓޯކޮށްފައިވާކަމަށް ފުލުހުން ބުނެފިއެވެ.
މާލޭގެ މަގުތަކަކީ އާންމުންނަށާއި ދުއްވާ ތަކެއްޗަށް އުނދަގޫނުވާގޮތަށް ބޭނުންކުރެވޭ ރައްކާތެރި ތަނަކަށް ހެދުމަށް ފުލުހުން ކުރަމުންދާ މަސައްކަތްތަކުގެ ތެރެއިން، ބޮޑުތަކުރުފާނުމަގުގައި ގަވާއިދާ ހިލާފަށް ޕާކުކޮށްފައި ހުންނަ އުޅަނދުތައް ނެގުމުގެ މަސައްކަތް މިރޭ ވެސް ފުލުހުން ވަނީ ކުރިއަށް ގެންގޮސްފައެވެ.
ފުލުހުން ވަނީ މަގުމަތީގެ ރައްކާތެރިކަން ދެމެހެއްޓުމަށާއި، ދަތުރުފަތުރަށް ހުރަސްއެޅޭގޮތަށް ގަވާއިދާ ހިލާފަށް އުޅަނދު ޕާކު ނުކުރުމަށް އިލްތިމާސްކޮށްފައެވެ. އަދި މިގޮތަށް ގަވާއިދާ ހިލާފަށް ޕާކުކޮށްފައިވާ އުޅަނދުތައް އަމިއްލައަށް ނެގުމަށް ވެސް ފުލުހުން ވަނީ ބުނެފައެވެ.
މަގުތައް ތަރުތީބުކޮށް އާންމު ދަތުރުފަތުރަށް ހުރަސްއެޅޭ ގޮތަށް ހުންނަ އުޅަނދުތައް ނެގުމަށް ފުލުހުން ކުރަމުންދާ މަސައްކަތުގައި އާންމު ރައްޔިތުންގެ ފަރާތުން ދެމުންދާ އެއްބާރުލުން ފާހަގަކޮށް، ފުލުހުން ވަނީ ޝުކުރު އަދާކޮށްފައެވެ.
މާލޭގެ ޓްރެފިކް މައްސަލަތައް ހައްލުކުރުމަށް ފުލުހުން ދާދި ފަހުން ވަނީ "ޓްރެފިކް އެންހޭންސްމަންޓް ޕްލޭން" އެއް ވެސް ތައާރަފުކޮށް، މަގުމަތީގައި ފުލުހުން ހަރަކާތްތެރިވާ މިންވަރު އިތުރުކޮށްފައެވެ.
ފުލުހުންގެ ތަފާސްހިސާބުތަކުން ހާމަވާގޮތުގައި މި އަހަރުގެ ފުރަތަމަ ހަ މަސްދުވަހުގެ ތެރޭގައި ވެސް ފުލުހުން ވަނީ ގަވާއިދާ ހިލާފަށް ޕާކުކޮށްފައިވާ 3،417 އުޅަނދު ޓޯކޮށްފައެވެ. އަދި އުޅަނދުތައް ޓޯކުރުމުގެ ކުރިން، އުޅަނދު ނެގުމަށް އެދި ވެރިފަރާތްތަކަށް 23،000 އަށް ވުރެ ގިނަ ފޯނު ކޯލު ކޮށްފައިވާ ކަމަށް ވެސް ފުލުހުންގެ ތަފާސްހިސާބުތަކުން ދައްކައެވެ.
ކުރިއަށް އޮތް ތަނުގައި ވެސް މަގުމަތީގެ ގަވާއިދުތަކާ ހިލާފުވާ ފަރާތްތަކާމެދު ފިޔަވަޅު އެޅުން ހަރުކަށިކުރާނެ ކަމަށް ކޮމިޝަނާ އޮފް ޕޮލިސް އަހްމަދު މުހައްމަދު ވަނީ ވިދާޅުވެފައެވެ.
