ފަތުރުވެރިކަމުގެ ދާއިރާއިން ލިބުނު ޓެކުހާއި ރިސޯޓް ކުލި އިތުރުވުމާ ގުޅިގެން، 24 ސެޕްޓެމްބަރު 2026 ގެ ނިޔަލަށް ދައުލަތަށް ލިބުނު ޖުމްލަ އާމްދަނީ 5.1 ޕަސެންޓް މައްޗަށް ހިނގައްޖެއެވެ.
މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސް އިން އެންމެ ފަހުން އާންމުކޮށްފައިވާ "ވީކްލީ ފިސްކަލް ޑިވަލޮޕްމަންޓްސް" ރިޕޯޓުގައިވާ ގޮތުން، މި މުއްދަތުގެ ނިޔަލަށް ދައުލަތަށް އާމްދަނީ އާއި ހިލޭ އެހީގެ ގޮތުގައި 30.205 ބިލިއަން ރުފިޔާ ވަނީ ލިބިފައެވެ. މިއީ 2025 ވަނަ އަހަރުގެ އެ މުއްދަތުގައި ލިބުނު 28.750 ބިލިއަން ރުފިޔާއާ އަޅާބަލާއިރު ފާހަގަކޮށްލެވޭ ކުރިއެރުމެކެވެ. މީގެ ތެރެއިން ޓެކުހުގެ ގޮތުގައި ލިބުނު އާމްދަނީ ވަނީ 21.366 ބިލިއަން ރުފިޔާއިން 23.388 ބިލިއަން ރުފިޔާއަށް އިތުރުވެ، 9.5 ޕަސެންޓްގެ ކުރިއެރުމެއް ހޯދާފައެވެ.
ފާއިތުވި ހަފުތާގެ ނިޔަލަށް ދައުލަތަށް ލިބުނު މައިގަނޑު އާމްދަނީގެ ތެރޭގައި ފަތުރުވެރިކަމުގެ ދާއިރާގެ މުދަލާއި ހިދުމަތުގެ އަގުން ނަގާ ޓެކްސް (ޓީޖީއެސްޓީ) ގެ ގޮތުގައި 7.880 ބިލިއަން ރުފިޔާ ލިބިފައިވެއެވެ. މިއީ މިދިޔަ އަހަރުގެ މި މުއްދަތުގައި ލިބުނު 7.669 ބިލިއަން ރުފިޔާއާ އަޅާބަލާއިރު 2.7 ޕަސެންޓްއިގެ އިތުރުވުމެކެވެ. މީގެ އިތުރުން ރިސޯޓް ކުލީގެ ގޮތުގައި ލިބުނު އާމްދަނީ ވަނީ 1.245 ބިލިއަން ރުފިޔާއިން 1.267 ބިލިއަން ރުފިޔާއަށް (1.7 ޕަސެންޓް) އުފުލިފައެވެ.
އާމްދަނީ ލިބޭ އެހެނިހެން ދާއިރާތަކަށް ބަލާއިރު:
- އިމްޕޯޓް ޑިއުޓީ: 13.1 ޕަސެންޓް އިތުރުވެ، 2.484 ބިލިއަން ރުފިޔާ
- ވިޔަފާރި އާއި މުދަލުގެ ޓެކްސް: 21.4 ޕަސެންޓް އިތުރުވެ، 5.778 ބިލިއަން ރުފިޔާ
- އާންމު ޖީއެސްޓީ: 10.8 ޕަސެންޓް އިތުރުވެ، 4.051 ބިލިއަން ރުފިޔާ
- އެއާޕޯޓް ސާވިސް ޗާޖާއި ޑިޕާޗާ ޓެކްސް: 8.8 ޕަސެންޓް އިތުރުވެ، 1.431 ބިލިއަން ރުފިޔާ
- މުދަލުން ލިބުނު އާމްދަނީ: 25.3 ޕަސެންޓް އިތުރުވެ، 1.856 ބިލިއަން ރުފިޔާ
- ހިލޭ އެހީ: ދެގުނައަށްވުރެ އިތުރުވެ، 0.237 ބިލިއަނުން 0.496 ބިލިއަން ރުފިޔާއަށް ވަނީ މަތިވެފައެވެ.
އާމްދަނީ އިތުރުވި ނަމަވެސް، ދައުލަތުގެ ޖުމްލަ ހަރަދު ވަނީ 2025 ވަނަ އަހަރުގެ އެ މުއްދަތާ އަޅާބަލާއިރު 18.8 ޕަސެންޓް އިތުރުވެ، 33.562 ބިލިއަން ރުފިޔާއަށް އަރާފައެވެ. އޭގެ ތެރެއިން ރިކަރަންޓް ހަރަދުތައް 28.897 ބިލިއަން ރުފިޔާއަށް އެރިއިރު، މުސާރައާއި އިނާޔަތްތަކަށް 10.702 ބިލިއަން ރުފިޔާ އަދި އިދާރީ ހިންގުމަށް 18.123 ބިލިއަން ރުފިޔާ ހޭދަވެފައިވެއެވެ. އަދި އާސަންދައަށް ކުރި ހަރަދު 23.3 ޕަސެންޓް އިތުރުވެ 1.748 ބިލިއަން ރުފިޔާއަށް އެރިއިރު، ސަބްސިޑީއަށް ކުރި ހަރަދު ވަނީ 77.1 ޕަސެންޓް މައްޗަށް ގޮސް 4.148 ބިލިއަން ރުފިޔާއަށް އަރާފައެވެ. މީގެ އިތުރުން ކައުންސިލްތަކުގެ ގްރާންޓަށް 1.884 ބިލިއަން އަދި އެހެނިހެން އެހީތަކަށް 1.899 ބިލިއަން ރުފިޔާ ހޭދަކޮށްފައިވެއެވެ.
ތަރައްގީގެ މަޝްރޫއުތަކަށް ކުރާ ކެޕިޓަލް ހަރަދުތައް 18.7 ޕަސެންޓް އިތުރުވެ 4.666 ބިލިއަން ރުފިޔާއަށް އަރާފައިވާއިރު، މީގެ ތެރޭގައި އުމްރާނީ ވަސީލަތްތަކަށް ކުރި 4.109 ބިލިއަން ރުފިޔާގެ ހަރަދު ހިމެނެއެވެ. އެގޮތުން ބިމާއި އިމާރާތްތަކަށް ކުރި ހަރަދު 35.2 ޕަސެންޓް، އަދި ފާލަމާއި ބަނދަރު ހެދުމަށް ކުރި ހަރަދު ވަނީ 57.3 ޕަސެންޓް އިތުރުވެފައެވެ.
ފިނޭންސް މިނިސްޓްރީގެ ރިޕޯޓުގައިވާ ގޮތުން، 24 ސެޕްޓެމްބަރު 2026 ގެ ނިޔަލަށް ދައުލަތުގެ ޕްރައިމަރީ ސާޕްލަސްގެ ގޮތުގައި ރެކޯޑުކުރެވިފައިވަނީ 0.442 ބިލިއަން ރުފިޔާއެވެ.
