ރ. މަޑުއްވަރީގެ މަގުމަތިން ބިދޭސީ އަންހެނަކަށް އަނިޔާކޮށް، އޭނާގެ އަތުން ފައިސާ ފޭރިގަތް މައްސަލައިގައި މީހަކު ހައްޔަރުކޮށްފިއެވެ.
ފުލުހުން ބުނީ މި މައްސަލައާ ގުޅިގެން ސެޕްޓެމްބަރު 26 ވަނަ ދުވަހު ކޯޓު އަމުރެއްގެ ދަށުން 24 އަހަރުގެ ނޭޕާލް ފިރިހެނަކު ހައްޔަރުކޮށްފައިވާ ކަމަށެވެ. އަދި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ފަސް ދުވަހަށް ބަންދުކުރުމަށް އަމުރުކޮށްފައިވާ ކަމަށް ފުލުހުން ވަނީ ބުނެފައެވެ.
ސެޕްޓެމްބަރު 24 ވަނަ ދުވަހުގެ 06:04 އެހައިކަންހާއިރު، ރ. މަޑުއްވަރީގައި ބިދޭސީ އަންހެނަކާ މެެދު މާރާމާރީ ހިންގައި އަދި އޭނާގެ އަތުން ފައިސާ ފޭރުނު މައްސަލަ ފުލުހަށް ހުށަހަޅާފައިވާއިރު ސޯޝަލް މީޑިއާގައި އާންމުވެފައިވާ ވީޑިއޯއިން ފެންނަ ގޮތުގައި އެ އަންހެން މީހާ މަގުމައްޗަށް ވައްޓާލުމަށްފަހު، ފިރިހެނަކު ވަނީ އޭނާގެ ގައިމައްޗަށް އަރާ، އަނގަމަތީގައި އަތްއަޅައި އަނިޔާކޮށް އިންޒާރުދީފައެވެ.
މި މައްސަލަ ފުލުހުން ދަނީ ތަހުގީގު ކުރަމުންނެވެ.
