ފާއިތުވެދިޔަ ހަތަރު ދުވަހު ރާއްޖޭގެ ދެކުނުގެ އަތޮޅުތަކަށް މެދުކެނޑުމެއްނެތި ކުރި ވިއްސާރައަށް ފަހު، އެ ސަރަހައްދުތަކުގެ މޫސުން ރަނގަޅުވެ، އާންމު ހާލަތަށް ރުޖޫއަވާން ފަށައިފި ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވިދާޅުވެއްޖެއެވެ.
އެންޑީއެމްއޭއިން ހާމަކޮށްފައިވާގޮތުން، ވިއްސާރައިގައި ބޮޑެތި ގެއްލުންތަކެއް ލިބުނު އައްޑޫ ސިޓީ، ފުވައްމުލައް ސިޓީ އަދި ގއ. އަދި ގދ. އަތޮޅުގެ ރަށްރަށުގެ މޫސުން މިހާރު ރަނގަޅުވަމުން އަންނަކަމަށް އެ ރަށްރަށުގެ ކައުންސިލްތަކުން ވަނީ މައުލޫމާތު ދީފައެވެ. އަދި ވިއްސާރައާ ގުޅިގެން މެދުކެނޑުނު އާންމު ހިދުމަތްތައް އަލުން ފެށި، ފެންބޮޑުވުމުގެ ސަބަބުން ބައެއް ރަށްރަށުގެ ނަރުދަމާ ނިޒާމަށް ދިމާވި މައްސަލަތައް ހައްލުކުރެވި، ހިދުމަތް މިހާރު ވަނީ ގާތްގަނޑަކަށް އާންމު ހާލަތަކަށް ގެނެވިފައެވެ.
މި ވިއްސާރައިގައި ގެއްލުން ލިބުނު ގެތައް ސާފުކުރުމާއި، ލިބުނު ގެއްލުންތައް ދެނެގަތުމުގެ މަސައްކަތް ކަމާބެހޭ ހުރިހާ ފަރާތްތަކެއް ގުޅިގެން މިހާރު ފަށާފައިވާކަމަށްވެސް އެންޑީއެމްއޭއިން ހާމަކޮށްފައިވެއެވެ. އަދި ދިރިއުޅުމަށް ދަތިވެގެން ވަގުތީގޮތުން އެހެން ތަންތަނަށް ބަދަލުކުރެވުނު އާއިލާތައް އަނބުރާ އެމީހުންގެ ގެދޮރަށް ބަދަލުވުމުގެ އިންތިޒާމުތައްވެސް ހަމަޖައްސަމުންދާކަމަށް އެއިދާރާއިން ހާމަކޮށްފައިވެއެވެ.
ރަށްރަށުގެ ހާލަތު އާދައިގެ ދިރިއުޅުމަކަށް ރުޖޫއަވަމުންދާއިރު، ފެންބޮޑުވި ސަރަހައްދުތަކާއި ގެދޮރު ސާފުކުރުމުގައި ސަމާލުކަންދޭންޖެހޭ ސިއްހީ އިރުޝާދުތައް، ސިއްހީ މަރުކަޒުތައް މެދުވެރިކޮށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ދަނީ އާންމުންނަށް ފޯރުކޮށްދެމުންނެވެ. އަދި ކުރިއަށް އޮތް ދުވަސްތަކުގައި، ވިއްސާރައިގައި ލިބުނު ގެއްލުންތައް ވަޒަންކުރުމަށްފަހު ސަރުކާރުގެ ފަރާތުން ފޯރުކޮށްދޭ އެހީތެރިކަން އެންޑީއެމްއޭއިން ވިލަރެސްކޮށް ފޯރުކޮށްދެމުން ގެންދާނެ ކަމަށްވެސް އެ އޮތޯރިޓީން މައުލޫމާތު ދެއެވެ.
ޕެސިފިކް ކަނޑުގައި އުފެދިފައިވާ 'އެލްނީނޯ' ގެ ސަބަބުން ރާއްޖެއަށް ކުރާ އަސަރު ބޮޑުވާނެކަމަށް ލަފާކުރެވިފައިވާތީ، ވިއްސާރަ ފެށުމުގެ ކުރިން ދުރާލައި ރައްކާތެރިކަމުގެ ފިޔަވަޅުތައް އެޅުމަށް މޫސުމީ އިންޒާރުތައް ދިޔައީ ނެރެމުންނެވެ. އެހެންކަމުން، ފެންބޮޑުވެދާނެ ކަމަށް ލަފާކޮށް ކައުންސިލްތަކާއި އެކި މުއައްސަސާތަކުން ދުރާލައި ތައްޔާރީ ފިޔަވަޅުތައް އަޅައި، މި ހާލަތަށް އިޖާބަދިނުމުގައި ކަމާގުޅުންހުރި އެންމެހައި މުއައްސަސާތަކުގެ ވަސީލަތްތައް ވަނީ ފުރިހަމައަށް ބޭނުންކޮށްފައެވެ.
މޫސުމާ ބެހޭ ގައުމީ އިދާރާއިން ލަފާކުރާ ގޮތުގައި، މިހާރު ކުރަމުންދާ ވިއްސާރަ ބުރާސްފަތި ދުވަހުން ފެށިގެން އެއްކޮށް އަލިވާން ފަށާނެއެވެ.
